H&TE Min-in scho a bawhzui lo: NSUI

National Students' Union of India (NSUI), Mizoram State chuan thuchhuah siamin, Higher & Technical Education (HTE) minister Dr R Lalthangliana'n zirlaite scholarship a bawhzui lo nia sawiin, HTE Minister chu zirlaite ngaihsak tâwk loah an puh.

NSUI, Mizoram chuan, zirlai tam takin Tribal Post Matric Scholarship & Pre Matric Scholarship an la dawn loh chungchangah Mizoram Scholarship Board (MSB) hotute an hmu tih sawiin, kum 2020-21 scholarship chu zirlai eng emaw zatin an hmuh tawh laiin, zirlai 17,000 chuangin an la dawng ve lo tih an tarlang.

Scholarship chungchangah MSB-in theihtawp an chhuah laiin, HTE minister Dr R Lalthangliana chuan hman nía Delhi-a a zin ṭumin a bawhzui lo niin an sawi a, "Central lama thuneitute a sawi pui miah lo. Zirlaite mangan tawh laia a changtu Minister-in Delhi a zinnaa scholarship a bawhzui miah lo hi pawi kan ti a, zirlaite ngaihsak tâwk lo hleah kan ngai a ni," an ti.

NSUI chuan, kum 2021-22 atan scholarship dil a hun leh tawh tih sawiin, "Hetih laia zirlai 17,000 chuangte'n an la hmu lo hi pawi kan ti hle a ni," an ti a; Mizoram sorkar chu zirlaite ngaihsak turin an chah a ni.