Covid vaccine la kim tawh swab test turte inkhung a ngai tawh lo
Health & Family Welfare department chuan October 24, Pathianni zan khan swab sample endiknaa inkaihhruaina thar a tichhuak.
Primary high risk contact zinga vaccine full dose la tawhte chu test neih hmain inkhung hran kher a ngai tawh dawn lo a, mitthi tawh sample endik tawh loh tur a ni.
Health department-in inkaihhruaina thar a tihchhuahah hian swab sample endik tur chin leh endik dan tur tarlan a ni a, thu dang a awm leh hma chu hman tur a ni.
Swab sample endik turte
1. Mizorama lo lutte chu entry point-a screening SOP ding lai angin test tur.
2. Covid-19 natna lang chhuak, e.g. khawsik, hrawk ná, thîp, khuh, hnár zâ/ping/hnaptui awm, kawṭhalo, rim hriatna hloh, thâwk harsatna nei (vaccine la tawh leh hri vei dam leh pawh ni se) RAT hmanga test thuai tur.
3. Covid-19 vei nena invênna vuah loa ft. 6 aia inhnaiha minute 15 aia rei lo awmhote chu an awmho aṭanga ni 5-10 chhungin RT-PCR/TrueNat hmanga test tur.
4. Primary high risk contact-te chu vaccine full dose la tawh pawh ni se test tur a ni a, test neih hma ni 5-10 chhungin inkhung hran a ngai lo a, fimkhur taka awm a tâwk.
5. Thla thum kal ta chhunga Covid-19 vei dam leh tawhte chu symptom an nei thar leh a nih loh chuan Covid-19 veite awm hnaih pawh ni se test kher a ngai lo. Covid vei awmna chhungkua home isolation-a awm an nih chuan contact tracing leh home isolation SOP an zawm ang.
6. Anmahni enkawltu doctor/hospital thuneitute’n Covid-19 test ti tura an hrilhte'n an test thei bawk.
Sample test dan
1. Sample lâk record-ah lak ní, dar zat leh minute zat chhinchhiah tel ngei tur a ni a, test result/certificate-ah tarlan bawk tur a ni.
2. RAT positive-te chu test nawn a ṭul lo.
3. Symptom nei chunga RAT negative chu rang takin RT-PCR/TrueNat hmanga test zui vat tur.
4. Symptom nei, RT-PCR/TrueNat test-a negative-te chu an khawsik 100.4°F aia sang emaw, oxygen level (Sp02) 94% aia hniam emaw, khuh reh lo leh zual lam pante chu hospital/doctor hnai ber panpui vat tur.
5. Tu mah an thih hnuin swab test tih loh tur a ni.