Hripui vei 158 hmuh belh a ni ; Ni 112 hnua hmuh tlem ber ní

October 24, Pathianni khan Mizoramah Covid-19 vei mi 158 hmuh belh a ni a, thla thum chuang, ni 112 hnua hmuh chhuah tlem ber ṭum a ni. Nimin khan hripui vei dam tawh mi 469 chhuahtir an ni a, hripui vangin mi pahnih an thi.

Covid-19 vei hmuh thar 158-te chu TrueNAT-PCR hmanga hmuh chhuah mi pakhat leh RAT hmanga hmuh mi 157 an ni a, mipa 68 leh hmeichhia 90 an ni. ZMC laboratory-ah leh Fluorescent Immunoassay (FIA) hmangin swab sample endik a ni lo.

District panga - Siaha, Champhai, Lawngtlai, Khawzawl leh Hnahthial district-ahte swab sample endik a ni lo a; hripui vei hmuh zat 158 hi July 4, 2021 (ni 112) hnua Mizorama Covid-19 positive hmuh tlem ber ní a ni a, July 4, Pathianni khan mi 88 hmuh chhuah a ni.

IDSP record angin, Mizoramah Covid-19 vei 1,17,419 hmuh chhuah a ni tawh a, mipa 57,299 leh hmeichhia 60,120 an ni. Nimin tlai dar 5 thleng khan mi 1,09,396 (93.17%) chhuahtir an ni tawh a, mi 413 (0.35%) thi tawhin, enkawl mek mi 7,610 (6.48%) an awm.

October 24, Pathiannia Covid-19 vei hmuh thar mi 158-te chu symptom nei 124 (78.48%) leh nei lo 34 an ni a; tualchhunga kái vek niin, an zingah hri kàina chin hriat loh 124 (78.48%) an awm. Kumin October thla ni 24 chhungin Mizoramah Covid-19 positive mi 22,589 hmuh chhuah a ni tawh a, chawhrualin ni tin mi 941.21 hmuh chhuah an awm ziah ang a ni a, a tlahniam hret hret zel.

Kum 2011 chhiarpui aṭanga chhûtin, Mizorama Covid-19 vei hmuh tawh 1,17,419 chu mi 1,000 zelah hripui vei mi 107 an awm ang a ni a; mi 1,00,000 zela Covid-19 vangin mi 37 an thi tawh ang a ni. Nimin khan tlai dar 5 thlengin hripui vei dam tawh mi 469 chhuahtir an ni a; Aizawl district-ah mi 245, Siaha district-ah 64, Hnahthial district-ah 53, Lunglei district-ah 33, Kolasib district-ah 26, Champhai district-ah 19, Lawngtlai district-ah 18, Khawzawl district-ah pasarih leh Saitual district-ah mi pali an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Covid-19 positive hmuh tawh 1,17,419 zinga mi 1,12,871 chu Mizoram chhunga kái chhâwng an ni a, mi 4,548 chu Mizoram páwn aṭanga an rawn luh hnua hmuh chhuah an ni.