Kan sorkar tûk aṭangin kan mithiamte Research hmangin ram kan hruai dawn - Lalduhoma

ZPM leader Lalduh-oma chuan, political party-te an ṭhat leh an chhiat tehna tur chu ro an rêl rei leh rei lohah ni loin, an thil tih leh hnathawh ṭhat leh ṭhat lohah a nih thu sawiin, ZPM an sorkar hunah an sorkar tûk aṭangin mithiam rualte'n research hmanga ruahmanna an siam hmangin ram an hruai dawn tih a sawi.

Nimina Lungdai ZPM Campaign Office-a MPF kaihhruai vantlang inkhawmah thu sawiin Lalduhoma chuan, "Party reng reng an ṭhat leh an chhiat kan tehna tur chu an rorêl rei leh rei loh aiin an thil tih leh hnathawh ṭhat leh ṭhat lohah a ni tur a ni a, chhungkaw tin leh ram leh hnam hmasâwnna atana hmalakna an neih leh neih lohahte kan teh bawk tûr a ni," a ti.

Lalduhoma chuan, "Tu nge ka vote ang a, tu kut hi nge ka tih chak ang tih hi kan rilruah awm se la, chumiah chuan tute hi nge ram hmangaih ber tih kan ngaihtuah tur a ni," a ti a; kum 35 chhung party pahnihin mipui retheihna hmanruaah hmangin inthlana chak nan an hman thu leh mipuite an inlilàmsiak thu sawiin, tunah chuan mipuiin MNF ni lo, Congress ni lo party an duh tawh thu a sawi.

Tun hnai hun rei lo tê chhûnga inthlan an hmachhawn tawha hmasawn ber leh pung nasa ber chu ZPM an nih thu sawiin Duhoma chuan, "ZPM-ah hian mipui beisei a sang em em a, an thikthu pawh a chhe bawk. Keini chuan mipui kan tibeidawng ve thiang lo a, kan sorkar tûk aṭangin kan mithiam rualte'n research base-a ruahmanna an siam hmangin ram kan hruai dawn a ni," a ti.