Congress vote tlinin hmasawnna a thlen - MPCC Treasurer

Congress party chuan nimin khan North Chaltlangah mi thar lawm luh inkhawm an buatsaih a; thusawitu MPCC treasurer Zodintluanga Ralte chuan, Congress vote tlinin rah ṭha, hmasawnna a thlen ṭhin thu a sawi.

Zodintluanga Ralte chuan, Tuirial Hydel Project chungchang sawiin, "Congress sorkar hmasa khan Tuirial HEP bul kan ṭan hman a, MNF an rawn sorkar khan compensation tam lutuk kha central-in an pe hlei thei lo a ni. Kan sorkar leh khan Pu Lal Thanhawla hoin bul kan ṭan leh a, kan zo hman a ni," a ti.

Tuna MNF kaihhruai sorkar hun rei lo te chhungin harsatna a tam thu sawiin Zodintluanga chuan, "Kum thum chhung harsatna chi hrang hrang a piang a, sorkar hnathawkin hlawh an la thei lo a, GP Fund duh hunah a lak theih hek loh," a ti a; sorkar ṭha a awm loh vangin mipui enkawl danah rorelna ṭha a awm theih loh thu a sawi.

MPCC Treasurer chuan, MNF sorkar hmasaah pawh harsatna chi hrang hrang a thleng nia sawiin, "Hel leh ruang chharte a tam em em. Chutiang karah chuan Congress party a lo ding chhuak a, kan ram a rálmuang a, sorkar ṭha a piang a ni," a ti.

MPCC thuchhuah chuan, North Chaltlanga inkhawmah hian Congress party zawm thar mi 71 an lawm lut niin a tarlang.