Robert Romawia sawi angin Skywalk project chhui ngei kan duh; minister a nih angin project tawp chhan a hre ber ang - Cong
MPCC Media hruaitute chuan, Sakawrhmuituai tlanga skywalk project chungchang chu Tourism minister Robert Romawia Royte-in a sawi ang ngeiin Lokayukta emaw, CBI emawin chhui ngei se an duh thu an sawi.
Nimina Aizawl Press Club-a thuthar thehdarhtute an kawmnaah MPCC Media hruaitute chuan, "Skywalk project-ah hian kum 2019 thleng khan hna thawh a ni a, Tourism minister Pu Robert Romawia Royte pawhin kum 2019 khan a tlawh nghe nghe. May 14, 2020-a tihchhuah Tourism department e-Book-ah pawh sorkar hmalakna kal mek anga tarlan a la ni," an ti.
Sakawrhmuituai skywalk project-a hnathawh chawlhsan chhan hre chiang ber tur chu Tourism Minister a nih thu sawiin MPCC hruaitute chuan, "Tourism Minister-in Lungdai mipui hmaa a sawi ang hian Lokayukta emaw, CBI emawin chhui ngei se kan ti," an ti a; CBI chah luh an tum rau rau chuan GAD Civil Aviation Wing-a principal consultant J Lalhmingliana thubuai pawh chhuitir nghal law law tura an ngen thu an sawi bawk.