Inthlan turah inhneh tâwka inhriat vangin Tuikuk vote îtna a awm - CYMA President

Central YMA president Vanlalruata chuan, Tuirial biala MLA by-election neih turah political party-te'n inhneh tâwk riaua hriatna an neih avangin Bru-te vote îtna a awma a lan thu a sawi.

CYMA-in October 25, Thawhṭanni zana Vanapa Hall-a hâlpuah, hâlmawi, silai lem a mu kap chhuak thei khap chungchang inzirtirna an buatsaihah CYMA President chuan, "Election Commission of India (ECI) pawh a ngawih reng laiin, party ṭhenkhatin Tripura-a Tuikukte hruai mai duhna an neih avangin ṭhutkhawm hmanhmawh kan nei a ni. An tih loh ngei kan beisei," a ti.

Vanlalruata chuan by-election boruak a ṭan thu sawiin, "Inhneh tâwk riaua rinna an nei a, tlin pawhin tling ṭâwk, tlâk pawhin tla ṭâwka rinna rilru an nei hlawm. Chu chuan Tuikuk vote îtna a neihtir niin kan hria. Kawng chhe tak hnuaia an camp aṭanga vote rawn thlak chu an huphurhin a rinawm," a ti a; Bru-te chu an duh thua an lo kala vote an thlak erawh an sawisel loh thu a sawi.

CYMA President chuan, Tuirial biala Hortoki leh Zodin khuaah Tripura-a awm mek Bru 663-in vote an neih thu sawiin, "Keini chuan kan duh loh ber chu an tana vote thlakna hmun siam leh vote thlak tura hruai a ni. Anmahni sensoa lo kal anga insawi maite kan hlau a, a ṭul chuan Hortoki leh Zodin khuaah kan tlan thla ang, tlân thlak kher pawh a ngai lo mai thei," a ti.

Bru-te chu kum 1997-ah anmahni duh thu ngeia Tripura-a an chhuk thu sawiin Vanlalruata chuan, "Vawi tam tak hruai kîr programme sorkar laipui kaihhruaina hnuaiah siam a ni a, chhungkaw tlemtê bak an lo lêt duh lo. Central sorkar huaihawtin MoU ziah a ni a, hun tiam chhungin an lo lêt duh chuang lo. A duh chu Mizorama lêt a, a duh Tripura awm nghet turin January 16, 2020-ah MoU ziah leh a ni," a ti.

CYMA President chuan, Tripura-a Bru awm, Mizorama vote nei, rawn lêt duh lote chu electoral roll aṭanga paih turin hmalak reng a nih thu sawiin, "CYMA hmalaknain deletion form sing chuang sign a nih pawhin paih an ni chuang lo. A chhan chu Ministry of Home Affairs (MHA)-in displaced person status a pekna a la hlih loh vang a ni," a ti a, MHA pawh nasa taka an nawr reng thu a sawi.

YMA bakah, Mizoram sorkar pawhin Bru-te chu electoral roll aṭanga paih an nih theihna atana an nawr reng thu sawiin Vanlalruata chuan, "MHA chêt muan vangin a fel thei lo. Kum 2023 MLA inthlanah chuan buaina a awm tawh loh ngei kan beisei. MHA leh ECI lamin hma an la dawn niin kan hria a, chutih rualin, a tak a thlen hma loh chuan lawm viauna chi pawh a ni lo," a ti.