Aizawl khawpuia inkalpawhna atan Thawhhona thuthlung ziah a ni

Ministry of Finance hnuaia Department of Economic Affairs (DEA), Mizoram sorkara Urban Development & Poverty Alleviation (UDPA) department leh Asian Development Bank (ADB) chuan nimin khan Aizawla inkalpawhna (transport) tihchangtlunna tur Aizawl Sustainable Urban Transport Project atan thawhhona thuthlung an ziak.

Thuthlungah hian Ministry of Finance aiawhin additional secretary Rajat Kumar Mishra, Mizoram sorkar aiawhin UDPA sec­retary K Lalthawmmawia leh ADB aiawhin country director Takeo Konishi ten hming an ziak a ni.

Aizawla transport tih­changtlunna tur hian Mizoram sorkar chuan DEA hnenah ADB ṭanpuinaa US dollar nuai 2,480 (cheng vbc. 1,860) vel sênga thawh tur Aizawl Sustainable Urban Transport Project a thehlut a; DEA chuan project buatsaih nan ADB sum hmangin Project Readiness Financing (PRF) loan lak phawt ni se, a ti.

PRF loan hnuaiah hian Aizawl Sustainable Urban Transport Project ruahmanna siam a, comprehensive mobi­lity plan, feasibility study, detail project report leh capacity building-te buatsaih tur consulting firm - Project Planning, Design and Management Consultant (PPDMC) leh individual consultant panga dang ruai turin ruahmanna siam a ni.

ADB sum US dollar nuai 56.3 vel sênga thawh tur PRF chu ADB leh DEA chuan pawm tawhin, inremna thuthlung, loan agreement leh project agreement an ziak ta a ni.

Project kal dan tur engkim ruahmanna leh DPR peih a nih hnuah Aizawl transport tihchangtlunna tur 'Aizawl Sustainable Urban Transport Project' thawhhna chu ADB sum hmang bawka a taka kalpui tura ruahman a ni.