ZPM-in Horticulture ram chhuhsaka hnung thak Inhiahsak tumah CM leh Tourism Minister puh

ZPM hruaitute chuan nimin khan Aizawl Press Club-ah thuthar thehdarhtute an kâwm; Horticulture changtu chief minister Zoramthanga leh Tourism minister Robert Romawia Royte chu Horticulture department ram chhuhsak a, hnung thak inhiahsak tawn tumah an puh.

ZPM secretary general PC Vanlalruata chuan, Mizorama Horticulture Centre hmasa ber leh changtlung ber, Chite Veng, Aizawla mi chu CM leh Tourism Minister-in an suasam mek niin a sawi a, "Centre hi kum 1986-87 vela bul ṭan a ni a, kum 1993-a Horticulture dept. a indan aṭang khan thuam ṭhat chhoh a ni. Cheng nuai sâng têlin Multipurpose Training Centre din a ni a, cold storage leh packing house-te nena thuam a ni," a ti.

Horticulture Centre chu B.Sc, M.Sc (horticulture & agriculture) zirlai leh research scholar-te'n ṭangkai taka an hman thu sawiin Vanlalruata chuan, "Israel techno­logy greenhouse eng emaw zah siam a ni a, serthlum, káwlthei, theihai, thingfanghma leh dragon fruit chi siam chhuah ṭhin a ni," a ti a; North East Scicon Bank (tissue culture) hmasa ber din a nih tawh thu a sawi.

ZPM Secretary General chuan, Centre chu NLUP leh SEDP hnuai­ah thlai chi hrang hrang ṭiak pe chhuaktu lian ber a ni ṭhin tih sawiin, "Hun rei tak ata vawiin thlengin kut hnathawktute innghahna leh an mamawh siam chhuaktu ber a ni," a ti.

PC Vanlalruata chuan, Chief Minister Zoramthanga chu 'Mizoram economy horticulture hmanga a dum leh var, chhim leh hmar anga thlak ka tum' titu a nih thu sawiin, "Ani hian kut hnathawktute tana rohlu tak chu Pu Robert Romawia kutah Tourism Convention Centre leh Aizawl Haat sakna atan a pe ta a ni," a ti a; an thil tih danah sum siam tumna lian tak a awm ngeia an hriat thu a sawi.

CM Zoramthanga leh minister Robert Romawia te inkawpin khaw êng zahna chhetê mah an nei lo tih a chian thu sawiin Vanlalruata chuan, "Kut hnathawktute ro hlu ber zinga Horticulture Centre hi hnung thak inhiah tawnna project lian taka an hmang tih mita hmutu tan phat rual a ni lo. ZPM chuan na takin a dodal dawn a, kut hnathawktute thlavang kan lo hauh na deuh a nih pawhin kan tih âwm tak ti-ah kan inngai ang," a ti.

PC Vanlalruata chuan, Tourism Convention Centre leh Aizawl Haat sakna tur chu central project a nih thu sawiin, "Congress pawh khan an hun laiin a sakna tur hmun an zawng hman a, traffic jam lohna tur deuh leh thil ṭha tihchhe lo zawngin hmun an zawng a ni," a ti a; CM leh Tourism Minister chu thil awm sa tichhe lo zawnga hmun dang ngaihtuah ve tura an duh thu a sawi a ni.