Chalfilh tlang humhalh dan tur sawiho

Nimin khan East Phaileng khuaa Buizova Hall-ah Environment Forest & Climate Change leh PHE department hotute leh Chalfilh Group YMA huaihawtin inràwnkhawmna neih a ni a, Chalfilh tlanga ramngaw chereu chhan leh a ven dan tur an sawiho.

Inkhawm hi Chalfilh Group YMA president Ngurthansanga Sailo-in a kaihruai a; Darlawn DFO Lalnunsanga Khawlhring chuan, Chalfilh tlangah kum 1970 khan reserve forest area square km. 60 a la awm thu sawiin, he tlang atang hian khaw 14-in tui in tur an lak mek thu leh ramngaw tihchereu nasat avangin humhalh a ngaih thu a sawi.

Central YMA vice president Lalhmachhuana chuan, YMA-in ramngaw leh nungcha humhalh a kalpui reng thu sawiin, "Chalfilh tlang hi ngaw ṭha leh se, tui hna lo pung leh se tih hi YMA duh dan a ni," a ti.

Tourism joint director Saitluanga sawi danin, Chalfilh tlang chhîpa tourist resort chu kum 2008 vela sak ṭan, phase I-ah cheng nuai 499 leh phase II-ah nuai 500 hmanga sak a ni. Resort siam nan thing an kih loh thu a sawi rualin, National Green Tribunal-ah thubuai an neih tâk avangin an hluihlâwn rih thu a sawi.

Centre for Envi­ron­ment Protection chairman AC Zonun­mawia chuan, Chalfilh tlang ngaw tihchhiat a nih avangin National Green Tribunal-ah an zualko thu a sawi a; Chalfilh tlanga mimal hnena pass pek zawng zawng sût a nih theih nan hma an lâk thu leh reserve forest chhunga ram neih chu dan kalh a nih thu a sawi bawk.