State mihring zat aṭanga Mizorama Covid-19 vei hmuh tawh zat 10.77%

Mizoramah Covid-19 vei 1,18,209 hmuh chhuah a ni tawh a, state mihring zat aṭangin 10.77% niin, ram chhunga state 28 zingah mihring zat aṭanga teha hripui vei tam lamah pathumna a ni zui zel.

Kum 2011 chhiarpuiah Mizo­ramah mihring 10,97,206 an awm a, chuta ṭanga chhut chuan October 25, Thawhṭanni thlenga Covid-19 positive hmuh tawh 1,18,209 chu 10.77% a ni. India ram state zinga Mizoram aia sang awmnate chu - Kerala 14.73% leh Goa 12.20% a ni a; Kerala hi hripui vei enkawl lai (active case) tamna ber a nih laiin, Goa-ah chuan mi 515 chiah an awm tawh.

Union territory telin Lakshadweep chu mihring awm zat aṭanga Covid-19 vei tamna ber a ni a, 2011 chhiarpuiah mi 64,473 an awm a, hripui vei hmuh tawh 10,365 chu 16.08% a ni. Mahse, hun eng emaw chen chu Covid-19 positive an awm tawh lo thung.

Nimin zing lamah sorkar laipuiin a tarlan danin, October 25 khan India ramah Covid-19 positive mi 12,428 hmuh chhuah a ni a, Kerala-ah hmuh thar (6,664) an tam ber zel. Mizoramah mi 790 hmuh chhuah a ni a, Mizoram aia hmuh thar tamna Kerala bakah, Tamil Nadu (1,112), Maharashtra (889) leh West Bengal (805) an awm.

Nimin zing lam dinhmun angin, Covid-19 vei enkawl lai (active case) Kerala-ah tam berin, mi 75,337 an awm a, Mizoram chu pangana niin, mi 8,093 an awm. Mizoram aia active case tamna state dangte chu - Maharashtra (26,797), Tamil Nadu (12,791) leh Karnataka (8,612)-te a ni.

Mizoramah Covid-19 positive hmuh chhuah tawh zat aṭanga teha enkawl mek zat percentage tlahniam sâwt hle mah se, active case 6.85% chu India ramah a sànna ber a la ni zui zel a; a dawttu Kerala chu 1.53% niin, state leh UT dang zawng chu 1% hnuai lam vek a ni tawh.

India rama mihring tamna ber state Uttar Pradesh-ah chuan active case 97 chiah an awm tawh a; mihring awm zat aṭanga chhûta positive hmuh tamna ber Lakshadweep-ah positive an awm tawh lo a, state leh UT zinga active case nei lo awmchhun a ni.