KHAWTHLIR

CIC thar tur Lalnunmawia
Mizoram Governor Brig. BD Mishra chuan Lalnunmawia Chuaungo, IAS chu Chief Information Commissioner atan a ruat a, CIC aṭanga October 17, 2021-a chhuak ta Lalduhthlana, IFS a thlâk ang. CIC atana Lalnunmawia Chuaungo ruatna notification hi October 20, 2021 khan GAD-in a tichhuak a; CIC thar hi a service (chief secretary) aṭangin October 31, 2021-ah voluntary pension-in a chhuak dawn a ni.

Thisen pe
T Romana College NSS unit chuan nimin khan an college-ah blood donation camp an huaihawt a, Aizawl Civil Hospital tan thisen unit 65 an pe a, petute mipa 54 leh hmeichhia 11 an ni.

CM-in hawng
Chief minister Zoramthanga chuan nimin khan a bial chhunga Ṭhuampui Branch YMA Library In a hawng a, bialtu councillor Vanlalneiha'n a ṭawiawm. Library in hi July 2017-a sak ṭan, October 25, 2021-a peih a ni a; a sak nan hian bialtu MLA Zoramthanga'n MLA fund Rs 5,00,000 a pe a ni.

Thiamna.com
Tharthilthlentu Society-in an enkawl thiamna.com tih chu nimin khan Mizoram Youth Commission chairman Dr Vanlalṭanpuia, MLA-in a tlangzarh. 'Mizo thiamna neite hian Mizoram tan eng nge kan tih theih?' tih thupuia hmangin sawihona hun hman nghal a ni.

Ar vulhtute intâwk khawm
Chhimphei Women Poultry Producer Company Ltd. chuan nimin khan Melriat Community Hall-ah Annual General Meeting vawi hnihna an hmang a, bialtu MLA Prof. F Lalnunmawia'n a hmanpui. Chhimphei Women Poultry Producer Company-ah hian member 313 an awm a, ar notê tihkeuna (hatchery unit) an nei a, ar puahna (chicken processing unit) an buaipui mek. Kum khata an sum vir vel chu cheng nuai 803.96 a ni.