Hâlpuah, hâlmawi, silai lem etc. khap Inzirtirna Central YMA-in an buatsaih

Central YMA chuan October 25, Thawhṭanni zan khan Vanapa Hall-ah hâlpuah, hâlmawi leh silai lem a mu kâp chhuak thei khap chungchang inzirtirna YMA branch-te tan a buatsaih a, Home minister Lalchamliana'n a hmanpui.

Home Minister chuan, hâlpuah, hâlmawi leh silai lem a mu kap chhuak theite chu mipui hriselna atana ṭha lo leh thil hnawksak, thil pawi thlen thei a nih thu sawiin, "Chìn dawklak mai mai leh sum tam tak sen ralna a ni. Khapna hi sorkarin khauh taka kalpui a tum," a ti a; gate nei department hrang hrangte chu state pawn aṭanga hâlpuah leh hâlmawi phurh luh tum an awm em tih uluk taka endik turin a ngen.

Lalchamliana chuan, dawrkaite chu sorkar khap thilte zuar lo tura chahin, "Police leh YMA-te'n uluk takin an check dawn. Check dawn vang pawh ni chuang loin, sorkarin mipui himna leh thil tha zawk tura a buaipui a nih avangin ṭha taka zâwm mai turin mi tin ka ngen a ni," a ti.

Home Minister chuan, Aizawla YMA branch hruaitu kal khawmte chu an veng ṭheuhah theihtawp chhuaha ṭan la turin a sáwm a, "Nikum lamah hâlpuah, hâlmawi, sky lantern hâl lo veng an awm nual a, an thil tih entawntlak tak avangin an chungah lawmthu ka sawi a ni," a ti a; veng entawntlakte chawimawia atan discretionary fund aṭangin lawmman siam leh a nih dawn thu a sawi.

Inkhawm hi CYMA president Vanlalruata'n a kaihruai a; CYMA vice president Lalhmachhuana chuan, "Chhiatna laka kan him zel theih nan khapna thupek hlawhtlin ngei theihna tura hmalak a ṭul a ni," a ti a; YMA branch hruaitute chu ṭan la lehzual turin a sawm a ni.