Vigilance Awareness Week hman a ni

Nimin khan Mizoram hmun hrang hrangah Vigilance Awareness Week hman a ni a, sorkar hnathawkte'n hlemhletna do a, eirûkna laka fihlim tura thutiam, integrity pledge an sawi rual. Week hi October 26 aṭangin November 1, 2021 thleng hman a ni ang.

Sorkar pisa hmunpui ber Secretariat-ah chuan chief secretary Lalnunmawia Chuaungo, chief vigilance officer ni bawk kaihhruaiin hman a ni a; Chief Secretary chuan, sorkar chu mipui tan leh mipuite'n hmasawnna an nei theihna atana awm a nih thu sawiin, "Sorkar hi sorkar hnathawkte leh keimahni intuituahna tura awm a ni lo a, hmasawnna ngaihtuah tura mipui suma rawih, a sûlsutu kan ni," a ti.

Lalnunmawia Chuaungo chuan, kumina Vigilance Awareness Week thupui 'Independent India @ 75: Self Reliance with Integrity’ tih chu a sawifiah a, "Hlemhlêtna leh eirûkna laka kan fihlim theih loh chhan chu kawng hrang hranga kan intodelh loh vang te, mamawh kan ngah vang te, duhàmna rilru kan neih vangte leh retheihna vangte a ni tlangpui," a ti a; eirukna laka fihlim mai duh tâwk loa theihtawp chhuaha do turin sorkar hnathawkte a chah.

Vigilance Awareness Week hi kum tin October thla chawlhkar hnuhnung berah hman a ni ṭhin a, India rama deputy prime minister leh home minister hmasa ber Sardar Vallabhbhai Patel pian champha October 31 thlen hma karah hman ṭan ṭhin a ni.

Vigilance Awareness Week hi Mizoram Police chuan Khatlaa Police Headquarters multipurpose hall-ah an hmang a; DGP SBK Singh hoin Mizoram Police hotute leh PHQ-a thawkte'n thutiam an chham rual.

Champhaiah chuan sorkar pisa hrang hranga thawkte'n eiruk leh hlemhletna laka fihlim leh nuaibo a nih theihna kawnga ṭul angte bawhzui turin intiamna thu an sawi rual a ni.

Hnahthialah chuan bawrhsap R Lalremsanga kaihhruaiin DC pisa tualah an hmang a, DC pisaa thawkte'n Vigilance Awareness Week pual thutiam an chham rual.