Covid-19 vangin mi 420 thi tawh

Nimin khan tlai dar 5 thlengin Mizoramah Covid-19 vangin mi paruk an thi a, an zinga panga chu natna dang nei tel an nih thu sorkar thuchhuakin a tarlang. Nimin tlai dar 5 thlenga Mizorama Covid-19 vanga thi tawh zat chu mi 420 an ni a, October thla kal mek bikah mi 110 an thi tawh.

S Laihrie (80), Tuipui Ferry chu October 24, Pathianni tlai dar 5:40 khan Siaha DCHC-ah a thi tih sorkar thuchhuakin nimin khan a tarlang. Covid-19 vei a ni tih October 20 khan hmuh niin, Siaha DCHC-ah dah nghal a ni.

Nimin khan zing dar 4:30 khan Sushil Suren (54), Lunglei Rahsi Veng chu Rahsi Veng CCCC-ah a thi a, hripui a vei tih October 25 khan hmuh chhuah niin, CCCC-ah enkawl a ni. Zing dar 7:25 khan H Hlakhu (76), Siaha chu SRH-ZMC-ah a thi a; Covid-19 vei a ni tih September 24 khan hmuh niin, October 9 aṭangin SRH-ah enkawl a nih thu sorkarin a tarlang.

Nimin zing dar 8:30 khan R Lalṭanpuia (75), Champhai Kahrawt chu Champhai DCHC (District Hospital)-ah a thi a, hripui vei a ni tih October 21 khan finfiah a ni. Vumkhawthanga (72), Champhai Bethel Veng pawh chawhma dar 10:55 khan Champhai DCHC-ah a thi a, Covid-19 vei a ni tih October 22-a hmuh chhuah a ni.

Nimin chawhnu dar 2:10 khan Lalmuanengi (65), Electric Veng, Aizawl chu SRH-ah a thi a, hripui vei a ni tih October 11-a hmuh chhuah niin, SRH-ah dah luh nghal a ni. Tlai dar 3 khan Phunliana (65), Ramhlun North pawh SRH-ah a thi a, hripui vanga thi 420-na a ni. Covid-19 positive a ni tih October 6 khan hmuh niin, October 12 aṭangin SRH-ah enkawl a ni.