Party dang ang kan ni ve lo - MNF Adviser

MNF chuan nimin khan Kawnpuiah street campaign an buatsaih a, thusawitu MNF adviser Dr R Lalthangliana chuan MNF chu party dang ang an nihve loh thu a sawi.

Dr R Lalthangliana chuan MNF chu kum 60 zet hming tidanglamve loin Pathian hruainain nung takin an kal mek nia sawiin, "Party dang ang kan ni ve lo. Tunah pawh leader ṭha tak pu Zoramthanga, Pathian ṭihmi kaihruaina hnuaiah kan kal mek a, harsatna lian tham tawk loin Pathianin min hruai zel a ni," a ti.

Hripui leng karah pawh buhfai, gas leh thil dangah harsatna liantham Mizoramin a tawk lo nia sawiin Dr R Lalthangliana chuan, "Covid-19 avanga Mizoram mipui zawng zawng kan thawhhona a ṭhat avangin lawmthu ka sawi a ni," a ti a, Covid-19 avanga sorkar an duhkhawp lohnaahte mipui ngaihdam a dil.

MNF Adviser chuan by-election atan Chief Minister kalin, minister leh MLA-te'n an ṭhutchilh tih sawiin, "Kan candidate hi in thlantlin chuan duhsak rawn tur in ni tih chu a chiang reng. SEDP hi financial year tharah chhungkaw tam tak chhawmdawlna turin kan ruahman dawn . Opposition MLA awmze nei lo tur nge, ruling MLA awmze nei thei tur in thlan dawn le," a ti.