ZPM Ṭhalaiin street campaign an khâr

ZPM ṭhalai headquarters chuan Tuirial bial by-election neih tura inpuahchahna atana street campaign an buatsaih ṭhin chu nimin khan Thingdawl leh Kawnpuiah a khàrna inkhawm an buatsaih a, mi hrang hrangin thu an sawi.

Kawnpuia street campaign khârnaah ZPM general secretary B Lalchhanzova chuan, 'Kan fel tawh ang' tiin Congress leh MNF party-te'n mipui hnenah ngaihdam an dil leh ta tih sawiin, "Rorelna chhe chi sáwn i pai nawn tawh lo ang u. Kum 35 chhung min bum nawn ṭhinna chhu chat ngam ila, 'Kan fing ve tawh dawn' i ti tawh ang u," a ti.

Thingdawla thu sawitu ZPM PAC member TBC Lalvenchhunga chuan, Mizoram political party-ah chhe bik an awm loh thu sawiin, "An kalphung hi a pawimawh ber zawk a ni," a ti. Mimal takin ruling MLA-te sawiselna tur a awm loh thu a sawi rualin, "Huaisenna an neih zui ṭhin loh avangin thil ṭha lo an hmaa an hmuh rengte an ngawih bopui ṭhin a, retheite rahbeh an ni a, retheite chan ái lâksak an ni ṭhin zawk a ni," a ti a; vote hmanga ram siam ṭha turin mipui a sáwm.

ZPM Ṭhalai street campaign khârna inkhawmah hian councillor pahnih - Christina Roluahpuii Sailo leh Baryl Vanneihsangi Tlau-te pawhin thu an sawi a ni.