Police-te sum siam nan hmang lo turin phût

Congress party ṭhalaite chuan thuchhuah siamin, Mizoram police-te mamawh loh zawk rálthuam cheng nuai 88 man lei tumna a awm niin an tarlang a; police-te chu sum siam nana hmang lo turin MNF sorkar an phût.

MPYCC chuan, Mizoram police ralthuam neihte chu tam angin lang mah se, silai zinga tam ber 9mm Carbine (SMG) leh 7.62mm SLR-te chu Indo Tibetan Border Police (ITBP), Assam Rifles, BSF leh NSG-te hman hlui a nih thu an tarlang a, "Hmun danga hman hlui, MNF sorkar hmasaa an leite a ni hlawm a, silai hluihlâwn lam tawh niin, CPMF leh sipaite phei chuan an hmang ngai tawh lo," an ti.

MPYCC tarlan danin, Mizoram police-te silai neih ṭhat zinga mi 7.62x39mm AK, 5.56 M-4 Carbine leh 5.56mm INSAS rifle-te chu police battalion tinah insem ta se, an la indaih lo nasa hle. Assam police-te'n 5.56mm INSAS Rifle chu an hman tlanglawn ber a nih tawh laiin, SLR leh 9mm Carbine SMG-te chu Mizoram police-te chelek ber a la ni. Silai ṭha zawk 7.62x39mm, 5.56mm M-4 Carbine, 5.56mm INSAS Rifle, etc.-te chu 2,500 an neih tlin loh laiin, silai hlui tawh 7.62mm SL Rifle/9 mm Carbine SMG, etc. 4,500 chuang an nei a ni.

Mizoram police-te chu ralthuam ṭha leh changkang zawka thuam an ngaih thu sawiin MPYCC chuan, "Silai ṭha zawk an mamawh thu vawi tam tak thlen tawh mah se, an mamawh ang lei a ni ngai lo. Tunah hian Mizoram sorkarin ralthuam lei belh a tum thu sawi a awm a, cheng nuai 88 sénga lei tum nia hriat a ni," an ti.

Congress ṭhalaite chuan, "Beretta Px4 9mm pistol, Glock19, 9mm Indian Army Standard leh .380 Revolver, etc. pek chhuah loha Armoury (silai dahna)-a a la awm del dul laia kan police-te mamawh hmasa zawk rifle ṭha ngaihtuah lo a, an neih ngah sa 9mm pistol lei leh ṭeuh an tum tih thâwm a awm hi kan ngaih a ṭha thei lo a ni," an ti a, mak an tih thu an tarlang.

MPYCC chuan, Mizoram police-te ralthuam neih ṭhat zinga a tam zawk chu Congress sorkar laia Police Modernization Scheme hnuaia lei a nih thu sawiin, "Kan police-te ralthuam tam zawk hi MNF sorkar laia hmun danga an hman hlui lei a ni hlawm," an ti. Cheng nuai 88 hmangin silai ṭha zawk (7.62 AK Rifle, Taurus T4 Carbine etc.) 100 chuang lei theih a nih laia an mamawh lêm loh lei tura ruahmanna hriat tur a awm chu thinrimthlak an tih thu an sawi bawk.