RRRa'n Congress thil tih dan mak a ti

MNF adviser Robert Romawia Royte chuan, ropeway leh skywalk project-a thil fel lo awm nia lang chhui chian tum a nih thu a sawi chungchang Congress party-in an sawi zui dan chu mak a tih thu a sawi.

Nimina Hortoki khuaa vantlang inkhawmah thu sawiin Robert Romawia chuan, "Ropeway-a sum chingpen nia lang chhui chian chungchang ngaihtuah a nih thu ka sawi kha Congress party-in chhui an cho thu leh contractor-in kum 2019-ah pawh hna a la thawk tihte an thuchhuaha an tiri duh kha a mak ang reng a, an rilru hriatthiam a har ka ti hle a ni," a ti.

Robert Romawia Royte chuan, Hortoki-a a kal hmasaka October thla chhungin volleyball court chu zana inkhelh theih nan siam a nih tur thu a sawi chungchang tarlangin, "October thla chhungin kan ṭan ang, ka ti a. A tûk lawkah election puan a ni ta si a, Model Code of Conduct avangin Hortoki-ah hian hna thawh theih a ni lo. Mahse, bungraw ngaite kan neih vek tawh avangin 60% vel zo tawh ang kan ni," a ti a; by-election-ah MNF an chak emaw, chak lo emaw, an siam zo thuai dawn tih a sawi.

MNF Adviser chuan, Chite Veng chu khawpui laili a ni tawh tih sawiin, "Convention Centre ropui tak dah a ni tur hi Aizawl mipui leh Zoram mipui an lawm a, Horticulture department-te nena enhoa sorkarin thutlukna a siam hi a fuh hle. Horticulture hmun ṭha zawk sorkarin a ngaihtuah ngei ang," a ti.