Ruling bial nihin awmzia a nei lo - ZPM Southern Hqrs.

ZPM Southern Hqrs., Lunglei hruaitute chuan nimin khan Aizawl Press Club-ah thuthar thehdarhtute an kâwm a; Lunglei district-a MLA constituency pasarih zinga pangaah MNF thlan tlin ni mah se, ruling bial nihin awmzia a neih loh thu an sawi.

ZPM Southern Hqrs. president C Lalhmingliana chuan, Tuirial bial by-election turah MNF-in ruling bial nih ṭhatzia uar taka an sawi ṭhin thu sawiin, "Lunglei district hi ruling bial vek deuh thaw a ni. Kum 2018 MLA inthlan khan Lunglei dist.-a bial pasarihah MNF chuan bial panga an la a, Lunglei khawpuia bial pali phei chu an la fai vek a ni. Tuna kan ruling MLA-te chet dan thlir chuan, opposition bial ni zawk ila, sorkar an nawr kal zawk daihin a rinawm," a ti.

Lunglei district-ah Covid-19 vei mi 9,000 chuang an awm tawh hnuah pawh chhim biala MLA-te'n sorkara hma an lakna an hriat loh thu sawiin Lalhmingliana chuan, "Hriatthiam har kan ti hle. Lunglei district-a mi 26 lai Covid kaihhnawih vanga thi an awm tawh chunga mipui thlamuanna thu an la sawi lo hi ram rawngbawl tlakah kan ngai thei lo," a ti a; Lungleiah RT-PCR khawl bun a nih theihna tura hma la ngam pawh ruling MLA zingah an awm loh thu a sawi.

Southern ZPM hruaitute chuan, Lunglei khawpui chhung kawngpuite chu a chhe hle nia sawiin, "Khawpui lian ber dawttu Lunglei khawpuia kawng ngaihthah lutuk a ni hi hriatthiam har kan ti a, kal hrehawm khawpin tui a tling nasa lutuk," an ti a; MNF MLA hlir awmna Lunglei khawpuiah ruling bial nih a chhenfakawmna pakhat mah an hmuh loh thu an sawi a ni.