Scholarship chungchang sawifiah

Mizoram Scholarship Board (MSB) secretary Dr PL Ramliana chuan, post-matric scholarship chungchanga Higher & Technical Education (HTE) minister Dr R Lalthangliana hmalaknain zirlaite'n scholarship an hmuh ngei a beisei thu a sawi.

Dr PL Ramliana hian nimin khan post-matric scholarship chungchang sawifiahna tichhuakin, HTE Minister-in chak takin hma a la niin a tarlang a, "Ministry of Tribal Affairs (MoTA)-ah DO letter-te thawnin, telephone-in a be tawh a, hei vang hian MoTA Secretariat-a thawktute pawhin Mizoram harsatna an hrethiam tawh hle," a ti.

MSB Secretary chuan, tribal scholarship chu MoTA-in scheduled tribe zirlai harsate hnena a pek ṭhin a nih thu leh Mizoram sorkarin 10% a tum ve ṭhin thu sawiin, "MoTA-in scholarship a pekte hi pre-matric leh post-matric scholarship-te an ni a, scholarship petu tak chu sorkar laipuia MoTA a ni," a ti a; a diltu zirlaite dilna endik vek a nih hnuah kum tin scholarship pek a ni a, sorkar laipuiin a rawn pek ang zelin Mizoram sorkar pawhin tikhawtlai loin a pe chhuak leh ṭhin niin a sawi bawk.

MSB Secretary tarlan danin, kum 2020-21 atana post-matric scholarship chu zirlai 15,828 hnenah pek a ni tawh a, zirlai 17,970-te'n an la dawng ve lo. A tam zawkin an la dawn loh chhan chu sorkar laipuiin a la pek chhuah belh loh vang a ni.