Vawiin tlaiah campaign hun tàwp dawn

October 30, 2021-a Tuirial Assembly constituency by-election neih tura campaign theih hun chu vawiin tlai dar 6 hian a tàwp dawn. Inthlan atana inbuatsaih peih thawhkhat a ni tawh.

Inthlana campaign hun hi vote thlak hun tawp aṭanga chhiar lêta darkar 48-na thleng a ni ṭhin a; tun ṭumah hian darkar 24 (ni khat)-a pawtseiin, vote thlak hun tawp aṭanga chhiar leta darkar 72-na thleng campaign theih a ni dawn a, chu chu vawiin tlai dar 6 a ni.

Dan ding lai angin, campaign hun a tàwp tawh chuan Tuirial bial chhung mi ni lo, inthlan campaign-a hun hmangtu zawng zawngte chu Tuirial bial chhung chhuahsan tura hriattir an ni.

Tuirial by-election neih tura polling station security leh medical duty tur mi 32-te tan nimin khan Kolasib DC conference hall-ah postal ballot hmanga vote thlakna hun hawn a ni a; Kolasib IPR conference hall-ah inthlannaa hman tur bungraw hrang hrang enkawl, thawn chhuah leh lak khawm kawnga mawhphur tura ruat Material, Despatching & Receiving Team mi 46-te tan training buatsaih a ni bawk.