Genome Sequencing Lab. hawng

Health & Family Welfare minister Dr R Lal­thangliana chuan nimin khan Zoram Medi­cal College (ZMC)-ah Genome Sequencing Labo­ratory leh ZMC Direc­tor quarters a hawng.

Sorkar thuchhuah tarlan danin, Genomic Sequencing Lab. hi Prog­ramme for Appro­priate Technology in Health (PATH), Seattle, USA-in an pek a ni a, laboratory dinna atan US dollar 52,000 (cheng nuai 38) an rawn pe a ni. ZMC-a Genomic Sequencing Lab. hi India hmarchhak bialah a palina a ni a; Dibrugarh, Imphal leh Shillong-ahte a awm tawh.

Laboratory hi Virus Research and Diagnostic Laboratory (VRDL) buil­ding-ah dah niin, nanopore sequencer hman­raw pawimawh dangte a keng tel a; virus strain chi hrang hrang, Covid-19 leh Covid-19 ni lo te, drug resistant genes in bacteria te, cancer genomics, HLA typing, adt. hmuh chhuah theih a nih bakah, zirchianna atan hman theih a ni.

ZMC Director quarters hi Mizoram sorkar sum cheng nuai 100 sénga sak niin, chhawng hnih a ni a; April 30, 2020-a sak ṭan, July 7, 2021-a sak zawh niin, a satu chu Zothan Consultancy Services a ni.

Thil pahnih hawnna inkhawmah Health Minister chuan, Covid-19 laka invên dan leh a veite enkawl dan chu danglam rih lo mah se, variant thar a awm ṭhin a, genetic structure inthlak a awmin inkài chhâwn a awlsam lehzual thei tih a sawi a, "Genomic Sequencing lab. hmang hian rang takin hrik tharte hmuh chhuah zung zung a nih chuan a invên kawngah pawh chêt a awlsam theih phah a beiseiawm a ni," a ti.