Myanmar ráltlân an rawn luh belh zel

Myanmar aṭangin sahimna zawnga Mizorama rawn lut an awm belh reng a; nimin chhuna dinhmun angin, Tuipuiral huam chhungah mi 2,828 leh Hnahthial district-ah 2,335 mi an awm mek a, Siaha district-a Zyhno-ah mi 1,000 chuang an awm mek bawk.

Champhai district-a Tuipui­ral group YMA secretary B Challian­ngura chuan, Tuipuiral tlangdungah Myanmar ráltlân a hlâwmpuia lut awm tawh lo mah se, mi 20-30 vela lut an la awm reng tih a tarlang a; páwl leh mimal aṭangin ṭanpuina an la hmu zel tih sawiin, ṭanpuina petute chungah an lawm thu a sawi.

B Challianngura chuan, a hlâwmpui ni loin, ni khatah mi 20-30 veltea Mizorama rawn lut an la awm zel thu sawiin, "Social media lama Myanmar sipaite'n Chin state-ah beihpui thlak an tum angin thuthang awm mah se, nimin thleng kha chuan mipui tichîâi khawpa sipai chêtna a la awm loa hriat a ni," a ti.

Hnahthial district-ah chuan Bawrhsap pisa chhinchhiah danin, nimin khan Myanmar aṭangin ráltlân mi 27 an luh belh a, anni nen hian ráltlân mi 2,335 an kawl mek. Mi 2,335 zingah hian chhungkaw 412 an tel a, district chhunga khaw 12-ah an awm mek a ni.

Hnahthial khawpuia Peniel Branch YMA chuan an huam chhunga ráltlân lutte tan nimin khan in sak hnatlang an nei a, an sa zo nghal. Hnahthial Electric Branch YMA pawhin ráltlânte chenna tur in pahnih tun hnai khan an sa bawk.

Siaha district chhung, Tipa (Tuipang) RD Block chhunga Myanmar ramri depa awm khua Zyhno-ah chuan nimin thleng khan kuminah Myanmar ráltlân mi sang khat chuang an dawngsawng tawh a, khawtlangin refugee centre-ah an awm lailâwktir ṭhin.

Siaha aṭanga thu dawn danin, Zyhno khua hi chhungkua 360 vel awmna a ni a, kuminah ráltlân 1,000 chuang an dawng tawh. Ráltlânte chu ei-in leh mutna an buaipui a, refugee centre aṭang chuan Mizoram hmun danga kalna tur hriate chu an kal chhuak a, Aizawl, Sairang, Lunglei, Lawngtlai leh Saika lamah an kal tlangpui.

Kalna tur dang nei lo mi 180 vel chu Zyhno-ah an awm mek a, a tam zawk chu hmeichhia leh naupang an ni a, awmna tur in eng emaw zat an sak hnuah sem rualin an dah khawm a ni. Zyhno-a awmte chu khawtlangin an ei leh in tur te, silhfen leh mutbute ngaihtuahsakin, an thawh khawm ṭhin a ni.