Hmarchhakah hripui vei leh hripui vanga thi thar tam berna Mizoram

October 26, Thawhlehni khan Mizoramah Covid-19 vei mi 740 hmuh chhuah a ni a, Thawhlehni chhun leh zanah hripui vangin mi pariat an thi a; Mizoram chu hmarchhak state pariat zingah hripui vei hmuh thar leh hripui vanga thih belh tamna ber a ni.

Nimin zing dar 8-a sorkar laipuiin Covid-19 report a tihchhuaha a lan danin, October 26 khan hmarchhak bialah hripui vei mi 1,372 hmuh chhuah a ni a, chu'ng zinga a zatve aia tam mi 740 (53.94%) chu Mizorama mite an ni. Hmarchhak state dang pasariha hripui vei hmuh thar belh khawm (632) aiin Mizoram bika hmuh thar 740 chu 108-in a tam zawk.

Sorkar laipuiin report thar a tihchhuah chin (October 26 zing dar 8 aṭanga nimin zing dar 8) huam chhungah hmarchhak state zingah Mizoramah Covid-19 vanga thi tam berin, mi pariat an thi a; hmarchhak state dang pasarihah mi paruk chiah thiin, NE state dang pasariha thih belh zat aiin Mizorama thih belh mi pahnihin an tam zawk a ni.

Covid-19 vanga thih belh hi Assam-ah mi pathum, Manipur-ah mi pahnih leh Sikkim-ah mi pakhat an awm a; Arunachal Pradesh, Meghalaya, Nagaland leh Tripura-ah thih belh an awm lo.

Nimin zing dar 8 thleng khan Mizoramah Covid-19 vangin mi 422 an thi tawh a, hmarchhak state zingah hripui vanga thi tlemna ber pathumna a ni a; Mizoram aia thi tlemna state pahnih - Arunachal Pradesh (280) leh Sikkim (395) an awm. Covid-19 positive hmuh tawh zat aṭanga thi zat percentage-ah erawh chuan NE state zingah Mizoram a hniam ber zel.

Hmarchhak state zingah hripui vei enkawl mek (active case) Mizoramah an tam fál zel a, Mizorama active case 7,766 chu hmarchhak pumpuia active case 13,819 aṭangin 56.20% a tling a; hmarchhak state dang pasariha active case belh khawm 6,053 aiin Mizoram bika active case chu 1,713-in a tam zawk a ni.

October 26-a Covid-19 vei hmuh thar tam lamah Mizoram chu India rama state 28 leh union territory pariat zingah pangana a ni a; active case tam lamah parukna a ni thung.