Covid-19 vangin mi 424 thi tawh

Covid-19 vangin October 26, Thawhlehni zan khan mi pakhat leh nimin khan tlai dar 5 thlengin mi pathum an thi a; nimina thi mi pathumte chu natna dang nei tel an nih thu sorkar thuchhuakin a tarlang.

Nimin tlaia IDSP tarlan danin, nimin tlai dar 5 thlenga Mizorama Covid-19 vanga thi tawh zat chu mi 424 an ni a, October thla kal mek bikah mi 114 thi an thi tawh.

October 26, Thawhlehni zan dar 8:05 khan Lalnunmawii (65), Tipa-V chu Siaha DCHC-ah a thi a, hripui vei a ni tih October 11-ah hmuh niin, October 26 khan DCHC-ah dah luh a ni.

Thawhlehni zan zanlai pelh hnu dar 12:40 (nimin zing) khan Ramdinngheti (34), Zawlnuam chu State Referral Hospital-ah hripui vangin a thi a, Covid-19 positive a ni tih October 13 khan hmuh chhuah niin, October 20 aṭangin SRH-ah dah luh a ni.

Nimin vek khan H Kaphranga (91), Mamit H/S Veng chu hripui vangin Mamit DCHC-ah a thi a, a thih hun darkar tarlan a ni lo. Covid-19 vei a ni tih October 18-ah hmuh chhuah a ni a, October 25-ah DCHC-ah dah luh a ni. Vanpuilala (52), Thinghlun, Mamit district pawh nimin chawhnu dar 1:15 khan Zawlnuam damdawi-in (PHC) Casualty-ah a thi. Thawhlehni khan inentir turin Zawlnuamah a kal a, RAT hmangin hripui vei a ni tih hmuh chhuah niin, zanlai pelh hnuah a thi a ni.