KHAWTHLIR

Thisen pe
Aizawl West College NSS unit chuan nimin khan an college hall-ah thisen pek an huaihawt a, Aizawl Civil Hospital tan thisen unit 35 an pe a, petute mipa 27 leh hmeichhia pariat an ni.

Lehkhabu tlangzarh
C Lalhluna buatsaih 'High School English Grammar Zirna Lehkhabu' tih chu nimin khan School Education director James Lalrinchhana'n School Education conference hall-ah a tlangzarh. Director chuan, zirtirtu leh ziaktu dangte chu khawvel inher danglam mila zirna leh ram leh hnam tana hmanraw ṭangkai buaipui zel turin a chah.

Minister-in hawng
Lunglei Bazar Veng community hall-a badminton court pahnih, cheng nuai 15 hmanga chei ṭhat chu nimin khan bialtu MLA C Lalrinsanga'n a hawng. Minister chuan, badminton court chei ṭhat tâk chu hun âwl hman ṭhatna atan leh badminton-a Mizoram mai ni lo, national level thlenga an veng tihmingṭhatu ni thei tura inzir nan hmang turin Bazar Veng ṭhalaite a chah.

Oil phur dawn lo
Mizoram Oil Tanker Owner's Union chuan, oil tanker tlânna rate chu rate hlui a nih thu sawiin, rate hlui hmanga contract pawhsei zel a nih avangin tlân man leh an senso a inmil thei tawh lo tih an tarlang a; rate thar an hman vat theih nan October 28-29 (vawiin leh naktuk)-ah tuialhthei an phur dawn lo tih an puang.

Hnathawh enfiah
Lai Autonomous District Council (LADC)-a executive member (Sports) C Hrangthianga hoin state leh LADC-a Sports department hotu te, Lawngtlai District Sports Committee, Lawngtlai District Football Association leh Central YLA hruaitute chuan nimin khan Lawngtlai College Venga Lawngtlai Residential Sports School an tlawh a, hna thawh mek an enfiah. Lawngtlai Residential Sports School tur hi PMJVK sum nuai 3,461.70 sênga sak a ni.