COVID-19: Mizoram dinhmun; Enkawl mek zat a tlahniam zel

October 26, Thawh­lehni khan Mizoramah Covid-19 vei mi 740 hmuh chhuah a ni a, October thla chhungin mi 24,119 hmuh a ni tawh. Nimin khan hripui vei dam tawh mi 783 chhuahtir an ni a, mi pathum an thi a; enkawl mek zat a tla-hniam zel.

Covid-19 vei hmuh tharte chu ZMC labo­ratory-a hmuh chhuah 142, TrueNAT hmanga hmuh 38, RAT hmanga hmuh 536 leh Fluorescent Immunoassay (FIA) hmanga hmuh 24 an ni a; mipa 318 leh hmeichhia 422 an ni.

IDSP record angin, Mizoramah Covid-19 vei 1,18,949 hmuh chhuah a ni tawh a, mipa 57,951 leh hmeichhia 61,018 niin, hmeichhia 3,067-in an tam zawk. Nimin tlai dar 5 thleng khan mi 1,11,544 (93.77%) chhuahtir an ni tawh a, mi 424 (0.36%) thi tawhin, enkawl mek mi 6,981 (5.87%) an awm.

October 26, Thawh­lehnia Covid-19 vei hmuh thar mi 740-te chu symptom nei 440 leh nei lo 300 an ni a; tualchhunga kái vek niin, an zingah hri kàina chin hriat loh 335 an awm.

Kumin October thla ni 26 chhungin Mizoramah Covid-19 positive mi 24,119 hmuh chhuah a ni tawh a, chawhrualin ni tin mi 927.65 hmuh chhuah an awm ziah ang a ni a, a tlahniam hret hret zel.

Kum 2011 chhiarpui aṭanga chhûtin, Mizorama Covid-19 vei hmuh tawh 1,18,949 chu mi 1,000 zelah hripui vei mi 108 an awm ang a ni a; mi 1,00,000 zela Covid-19 vangin mi 38 an thi tawh ang a ni.

Nimin khan tlai dar 5 thlengin hripui vei dam tawh mi 783 chhuahtir an ni a; Aizawl district-ah mi 584, Lunglei district-ah 68, Champhai district-ah 40, Serchhip district-ah 26, Saitual district-ah 24, Kolasib district-ah 21, Lawngtlai district-ah 19 leh Khawzawl district-ah mi pakhat an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Covid-19 positive hmuh tawh 1,18,209 zinga mi 1,14,401 chu Mizoram chhunga kái chhâwng an ni a, mi 4,548 chu Mizoram páwn aṭanga an rawn luh hnua hmuh chhuah niin, ni nga chhung a záwnin state páwn aṭanga rawn lut zingah Covid-19 positive hmuh an awm tawh lo a ni.