Tuirial bial inthlan tur hi kum 5 atan ni lo, tun term atan chauh a ni - Zoramthanga

MNF party chuan nimin khan Tuirial biala MLA by-election campaign khârna hun Bûkpui leh Lungdaiah an buatsaih a; MNF president Zoramthanga chuan, Tuirial biala inthlan tur chu kum 5 atan ni lo, tun term kal mek atan chauh a nih thu a sawi.

Zoramthanga chuan, MLA atan sorkara mamawh thlen inthla­hrung lo tur thlang thiam turin mipui a chah a, "Tun ṭum Tuirial bial MLA thlan tur hi kum nga atan ni loin tun term kal mek, kum hnih la awm tur atan chauh a ni. Kum tharah chuan SEDP pawh eng emaw chen kalpui tum a ni," a ti.

MNF chu harsatna karah Pathianin a hruai thu sawiin Zorama chuan, "A hming hi vawi khat pawh thlâk chhin a la ni lo a, 'Pathian leh kan ram tan' tih a la ni ngat ngat. Covid hripui hun harsa takah Pathianin MNF hi sorkarna chang turin a ruat a ni," a ti a; harsatna su tlangin hmasawnna rahbi tak tak an rah theih a rin thu a sawi.

Zoramthanga chuan Congress chungchang sawiin, "Congress unaute hi an hun lai chuan kan ngam lo. Delhi-ah an sorkar a, state leh district council zawng zawngah an sorkar. MNF sorkar ve pawh kha an hnûkthlu leh a nih kha. Pathian ruat an nih lai chuan hneh theih an ni lo. Tunah erawh chuan president tur pawh an nei ta lo," a ti.

Lal Thanhawla kum 20 chuang chief minister a ni a, a bial Serchhipa by-election neihah Congress-in an dahkham an chawi tih sawiin MNF President chuan, "Ka rin danin, kum 2023 MLA election-ah chuan Congress hian MLA pahnih/thum an neih chuan an vannei ngawt ang. Artelukawn thei an ni," a ti a; Congress hun a tawp tawh niin a sawi.

ZPM chungchang sawiin Zoramthanga chuan, "Kalphung thlak zing lutuk leh party hming pawh thlâk zing lutuk chu tui anga nghet lo an ni a, enchhin chi an ni lo. Nupui pawh neih chhin chi a ni lo a, sorkarna pawh inpek chhin chi a ni lo. Kum 35 chhunga mahni party thlaka kalphung thar hre reng maite hi enchhin chi an ni lo," a ti.

MNF President chuan, "Nupui thlak tam hi chhuan chi a ni lo a, nupui nghet taka neih a ṭha ber," a ti a; kawng sira thing lian ding luah chu zuang thing tih an hriat chuan tu mahin tuah atan pawh an duh ngai lo tih a sawi.

Inkhawmah hian MNF adviser Lalchhandama Ralte pawhin thu a sawi a; MNF thuchhuah chuan, an party zawm thar Bukpuiah mi 46 leh Lungdaiah mi 34 an lawm lut niin a tarlang.