Campaign chhunga mi rilru tihnat palh Ka nei a nih chuan ngaihdam ka dil e - Chalrosanga Ralte

Congress party chuan nimin khan Kawnpui, Lungdai, Thingdawl, Bualpui, Hortoki leh Khamrangah campaign khârna inkhawm an buatsaih a, an candidate Chalrosanga Ralte chuan, campaign chhungin mi rilru tihnat palh a nei a nih chuan ngaihdam a dil tih a sawi.

Chalrosanga Ralte chuan MPF hmalakna fakin, "In duh loh zawnga chêtna kan lo nei palh a nih chuan a pawi kan ti tak zet a, kan zah em em che u. In lakah vuina tur pakhat mah kan nei lo. Nangmahni avangin kan fimkhur phah a, kan dik phah sawt a, sum pawh nasa takin kan sèn tlem phah a, kan lawm em em a ni," a ti.

INC Candidate chuan, campaign-naah rilru tihnat palh a neih chuan an ngaihdamna a dil tih sawiin, "Kan duh rêng vang ni loin, tih tak zeta Tuirial bial tana tlin tuma kan beih vangah min ngaihsak hram rawh u. Ka candidate puite leh party dangte lakah ka lawm a, a hminga MLA lo ni tawh leh experience nei awmchhun ka nihna laiah min zah thiam em em a ni," a ti a, thianghlim taka an campaign tlánga a hriat thu a sawi.

Chalrosanga chuan, an campaign chhung zawngin harsatna lian tâwk loin an tlingtla thei tih sawiin, "Sorkar ṭha siam ngei tuma nasa taka insiamṭha mek Congress party leh keima lakah Tuirial mipui tam takin rinna an nghat a, kan party-a la awm ngai lo leh awm tawh lo tam takin min rawn zawm thar hi kan lawm tak zet a ni," a ti.

Mipui thlàwpna an dawng ṭha hlea a hriat thu sawiin Mavala chuan, "Hei hi kei leh Congress party ṭhat vang leh theih vang a ni lo a, Pathian hnathawh liau liau a ni tih ka chiang hle. Kan campaign boruak hi Pathianin min hriatpui a, min awmpui tlat niin ka hria a, Pathian hnenah lawmthu ka sawi a ni," a ti a; thlan tlin a nih chuan Tuirial bial mipui a tihbeidawn loh tur thu a sawi.

INC Candidate chuan, kohhran rawngbawltute'n hriatthiamna leh ngaihdamna rilru nen an en tih sawiin, "Min vote turin ka ngen nawn leh che u. In pawi kan lo sawi tawhnaah ngaihdam kan dil a, insiamṭhat tumin theihtawp kan chhuah mek a ni. Ram leh mipui rawng kan bàwlnaah humsual kan dài loh nan min venpui ula, in beramte kan nih angin min kaihruai zel rawh u," a ti.

Tuirial bial mipuite chu vote thlak tura ngenin Chalrosanga chuan, "Vote thlak hi khua leh tui kan nih anga kan tih tur a ni tih hriain ṭhahnemngai taka vote thlak turin ka ngen che u a, hlauh nei miah loin, tu mitmei mah veng loin, rilru thianghlim takin vote thlak rawh u," a ti a; a tling emaw, tling lo emaw, Tuirial bial mipui a thlahthlam loh tur thu a sawi.

Khaw hrang hranga campaign khârna inkhawmah hian MPCC hruaitu hrang hrangte'n thu an sawi a; MPCC thuchhuah chuan, campaign khar inkhawmah mi 307 in Congress an zawm thar niin a tarlang.