ZPM President-in Andrew hre reng chunga vote thlak turin Tuirial bial mipui a sawm

October 30, 2021-a Tuirial bial MLA by-election neih turah ZPM chuan nimin khan Kawnpuiah campaign khârna an buat­saih. ZPM president Lalliansawta chuan, bialtu MLA thi ta Andrew H Thang­liana hre reng chunga vote thlak turin Tuirial bial mipui a sáwm.

ZPM President chuan, an luah lai leh neitu nia an inngaih mekna bialah lusûnna avangin inthlan an hmachhawn a ngai tih sawiin, "Kan tlin ngei pawh kan beisei. Bialtu MLA boral ta Pu Andrew-a hre renga bial mipuite'n rilru fím tak púin vote thlak ila, 'Kalphung thar, mipui sorkar' din a nih ngeina tura bul ṭan nan Pu Laltlanmawia hi vote vek turin ka sáwm tak meuh che u a ni," a ti.

ZPM leader Lalduh­­oma chuan, ram siam­ṭhatna turin kalphung thar, mipui sorkar din chu an thupui a la ni reng tih sawiin, "Chumi kalpui tura kawng kan bo loh nan road map kan nei vek tawh a ni," a ti a; 'Kalphung thar, mipui sorkar' din huna tih tur pawimawh point 24 a sawifiah.

ZPM working presi­dent K Sapdanga pawhin thu sawiin, an party hlapui chu 'Kan ram leh hnam chhan turin sum leh pai hausakna a ngai lo a, dikna, rinawmna leh huai­senna a ni' tih a sawi a, "ZPM candidate-in suma i vote lei a rawn tum chuan i lo hnar ang a, i lo vote loh phah dawn nia. Hmanraw bawlhhlawh tak hmanga tlin ai chuan, thianghlim taka tlak kan la thlang zawk a ni," a ti.

K Sapdanga chuan, Tuirial bial chu bial sakei a ni lo tih sawiin, "Party politics âtchilh lo, fím taka politics thlír thiam, chu'ng mite hawi lam apiangin hnehna an chan ṭhinna a ni. Kum 2018 inthlanpuiah pawh keini páwl naupang ber kha hnehna min pe a, chu'ng mipui tho chu tuna vote thlak turte hi an ni," a ti.

ZPM working president chuan kum 2023 inthlana party mipuiin lungrual taka Chief Minister tura pawm fel leader Lalduhoma an neih fel tawh thu a sawi bawk.

ZPM candidate Laltlanmawia chuan, party dang aia ZPM a thlan chhan sawiin, "Pathian hnenah ṭawngṭaiin kan dil a, a chhànna kan hmuh chu ZPM candidate nih a ni. Politics aṭanga ram siam hna thawk turin ZPM ka zawm a, kalphung thar hmangin Mizoram siamṭhat ka duh. Ka hmachhawpte tihlawhtling tur leh ram siamṭhatna tur bul ṭan nan min thlang turin ka sawm tak meuh che u a ni," a ti.

Laltlanmawia chuan, tun ṭum inthlanah a tling lo palh a nih pawhin bial mipui tlànchhiatsan loin, theihtawp a chhuah zui zel dawn thu a sawi bawk.

PAC member TBC Lalven-chhunga pawhin thu sawiin Tuirial bial mipuite chu hnathawh kawr ha turin Laltlanmawia thlang turin a ngen a;AMC councillor Baryl Vanneihsangi Tlau chuan ZPM candidate kawmna hun a hmang bawk.