BJP nihna Mizoram mipuiin an hriat ka duh - BJP President

BJP, Mizoram Pradesh president Vanlalhmuaka chuan, Tuirial bial by-election chu an party tan darthlalang pawimawh tak a nih thu leh BJP kalphung leh nihna chu Mizoram mipuiin an hriat a duh thu a sawi.

Nimina campaign hun tàwp an hmannaah Vanlalhmuaka chuan, party dangin mipui koh khawm nan sum an sem nia sawi a nih thu tarlangin, "Keini chuan public meeting neia sum sem tur kan nei lo. Sum sem hi a pawi chhan chu, sum an sèn zawng zawng hi an tlin hunah a hmuh lêtna tur an zawn a ngai leh ngei dawn a ni. Keini BJP chuan corruption tihbo kan duh a, mipui thleng phak development kan duh bawk avangin therhlo sem kan ti ve lo a ni," a ti.

BJP President chuan, central-a an hruaituten an chah ngun em em chu, 'Mi, a sakhuaa a rinawm loh chuan ram rawngbawl tlak a ni lo' tih a nih thu sawiin, "Mizorama politician-te hian hei kan hriat thar a, mipui pawhin Krista duh dan pêla kal politician-te chu kan hnualsuat ngam a hun ta hle a ni," a ti. BJP President hi BJP ṭhalai hruaitute'n an ṭawiawm a ni.