Tuirialah campaign hun a tâwp ta; Postal ballot-ah vote thlâk kim tawh

October 30, 2021-a Tuirial Assembly constituency by-election neih tura campaign hun chu nimin tlai dar 6 khan a tàwp. He inthlana postal ballot hmanga vote thlak turte chuan an thlâk kim tawh.

Campaign hun a tàwp dawn avangin nimin khan political party hrang hrangte chuan campaign khârna hun an hmang a, Tuirial bial páwn aṭang pawhin mi eng emaw zat an pungkhawm a ni.

Kolasib district election officer (DEO) Dr H Lalthlangliana, bawrhsap chuan Election Commission of India thu angin hriattirna a tichhuak a; campaign hun a tawp hnuah chuan candidate leh election agent-te tih loh, Tuirial biala vote nei lo zawng zawng chu Tuirial bial chhuahsan vek turin a hriattir.

Dr H Lalthlangliana hian nimin khan a pisaah thuthar thehdarhtute kâwmin, Tuirial bial by-election atana postal ballot hmanga vote thlak turte'n an thlâk kim tawh thu a sawi a, "Service vote 134 thawn chhuah aṭangin hmuh lêt a awm lo thung," a ti.

Kolasib DEO sawi danin, October 30, 2021 (Inrinni)-ah vote thlak tur niin, zing dar 7 aṭanga tlai dar 5 thleng vote thlak theih a ni dawn a, tlai dar 5-6 inkar chu Sabbath serhte leh Covid-19 veite'n vote an thlakna hun bik atan ruahman a ni. Vote tlate chu November 2, 2021 zing dar 8 aṭangin Kolasib College main hall-ah chhiar a ni ang.

MPF-in party pathum - MNF, INC leh ZPM lakah lungawi lohna pakhat ṭheuh a hnena an thlen thu sawiin Kolasib DEO chuan, political party-te chuan ECI-in campaign theih hun chhung tura a ruat zawm ṭheuh turin a ngen a ni.

Dr H Lalthlangliana chuan, Tuirial biala vote nei, Tripura-a awm Bru-te chu a hranpaa vote an thlakna tur polling station siamsak lo a, an vote neihna khuaa vote an thlak chu an dikna chanvo a nih thu a sawi a, "Heng mite hi party miten therhlo hmanga an thlêm lohna turin sectoral magistrate-te Tripura camp-a awm Tuikukte'n vote an neihna khuaah uluk taka duty-tir an ni," a ti.