Scholarship pek chhuah thuai phût

ZPM Ṭhalai hruaitute chuan nimin khan Aizawl Press Club-ah thuthar thehdarhtute an kâwm a; kum 2020-21 atana zirlaite scholarship pek chhuah thuai an phût thu an sawi.

ZPM Ṭhalai senior vice president Dr C Lalrammawia chuan, Ministry of Tribal Affairs aṭanga scheduled tribe-te tana pre & post matric scholarship pek chhuah ṭhin chu Mizo zirlaite tana zirna sang zawk an chhunzawm theih nan a ṭangkai hle tih sawiin, "Tun hnaiah scho­larship a hun taka pek loh leh sum sanction sa pawh state sorkarin state matching share a pek theih loh avanga tihkhawtlai a ni ta fo hi hriatthiam harsa kan ti. Kum 2020-21 scholarship hrènsak hi pek chhuah thuai kan ngen a ni," a ti.

Dr C Lalrammawia chuan, Mizoram sorkarah zirlai sing télin scholarship an dil ṭhin thu sawiin, "Central-in 90% a rawn tumsak bak 10% zirlaite tan state sorkarin a lo do sak ve a ngai ṭhin. Heti chung hian kum tin budget pharh a nihin zirlaite scholarship do lêtna tur hi dah a ni ngai lo," a ti a; central aṭanga sum lo thleng pawh state sum neih dan azira siam rem a, Supplementary Demand hmanga scholarship do lêtna tur siam rem chawp a ni ṭhin chuan sorkarin zirlaite hmakhua a ngaih lohzia a tihlan thu a sawi.

Kum 2020-21 scholarship atana do lêtna tur cheng nuai 437.22 chu kum tàwpah dil belh niin, pass thlap tawh a nih thu sawiin ZPM ṭhalaite chuan, "Hetiang a ni chunga vawiin thlenga dawng lo mangang zirlai sing chuang an la awm hi a mak hle. Kumin budget kal mekah mamawh hriat sa reng zirlaite tan hian a do lêtna tur kan sorkar hian sum cheng khat mah a dah lo. Phuahchawp leh tlachawpa budget kalpui ṭhin sorkar hi thlâk a ngai tawh tih a lang chiang hle a ni," an ti.