KHAWTHLIR

Lirthei lian khap
Aizawl Traffic SP Rodingliana Chawngthu chuan, Ṭhuampui Vengthar - Chite - Ramthar North inkar kawnga Chite lei chu a zìm avang leh a ngheh loh avangin he kawngah hian lirthei lian (HMV/MMV) tlan khap a nih thu a puang. Thupek hian thu leh awm hma chu a huam ang.

Lehkhabu tlangzarh
Dr B Thangdailova ziah, 'Mizoram hriselna kailawn dawhtute' tih lehkhabu chu nimin khan Health minister Dr R Lalthangliana’n Civil Hospital, Aizawl conference hall-ah a tlangzarh. Minister chuan, sorkar laipui leh hmun dang aṭanga ṭanpuina hmuh hmangin kum nga hnuah Mizoram health infrastructure-in hmél danglam dâwrh khawpa hma a sawn a beisei thu a sawi.

Covid-19 vangin 425 thi tawh
Covid-19 vangin nimin chhun khan mi pakhat a thi. IDSP tarlan danin, nimin tlai dar 5 thlenga Mizorama Covid-19 vanga thi tawh zat chu mi 425 an ni a, October thla kal mek bikah mi 115 an thi tawh.
Nimin chhun dar 11:30 khan Laltlanmawia (57), Zawlnuam Borai, Mamit district chu Covid-19 vangin Kawrthah Covid Care Centre-ah a thi a, natna dang nei tel a ni. Covid-19 vei a ni tih October 25 khan hmuh chhuah a ni a, hemi ni hian Kawrthah CCC-ah dah nghal a nih thu sorkar thuchhuakin a tarlang.

Lem inziahsiak lawmman sem
Mizoram Police-in ram tana nun hlan police-te hriatrengna ní, Police Commemoration Day puala 'The Martyrs, My Hero' tih thupui hmanga lem inziahsiak a buatsaih result chu nimin khan DGP conference hall-ah puan a ni a, DGP SBK Singh-a'n a hmanpui.
Lem inziahsiakah hian 1st MAP English Medium School aṭangin zirlai 15 an tel a; pakhatna R Lalnunfeli'n Rs. 2,000, pahnihna Catherine Vanlalpekhlui'n Rs. 1,500 leh pathumna Zothanmawia'n Rs. 1,000 an dawng a; an pathum hian pawl 9 zirlai an ni.

Covid-19 No Tolerance Week
Hnahthial district-ah nimin zing dar 6 aṭang khan Covid-19 No Tolerance Week hman ṭan a ni a, November 4, 2021 tlai dar 6 thleng a awh ang.
Covid-19 No Tolerance Week hi Hnahthial district-a Covid-19 vei an tlakhniam theih loh avanga bawrhsap Lalremsanga kaihhruaia District Hospital thawktu te, khawtlang hruaitute leh pawl hrang hrang aiawhte rorel bawhzuina a ni. Week chhunga mipui zawm tur inkaihhruaina siam a ni a, chumi bawhchhiate chu hrem/pawisa chawitir tur a ni.