Champhaiah tui chungchang sawiho

Champhai District Water & Sanitation Mission Committee (DWSMC), District Sanitation Task Force (DSTF) leh Jal Shakti Abhiyan - Catch the Rain Campaign expert team-te chu nimin khan DC conference hall-ah bawrhsap Maria CT Zuali hoin an ṭhu a; faina, plastic hman khap, tuihna humhalh leh ruahtui khâwl lama hmalakna leh hmachhawpte an sawiho.

Maria CT Zuali chuan, fai turin tui a pawimawh thu sawiin, "Ni tin khawsaknaah tui tel lo chuan nunphung a buai a, sik leh sa inthlak, ramngaw chereu leh lei hnuai tui awm kiam zel avangin tui a harsa tulh tulh a ni," a ti a; plastic leh chemical hman nasat vangin tui a bawlhhlawh zel thu a sawi.

Ṭhutkhawmah hian DWSMC hnuaia páwna inthiar awm lohna, open defecation free (ODF) plus verification team, RD block pakhat zelah member pali awmna tur an din a, November chawlhkar khatna aṭangin endik nghal ni se an ti.

DSTF kaihhnawih Plastic Waste Management Amendment Rules, 2021 zirho a ni a, ip ṭawih thei (non woven bag) leh a dangte hriselna leh leilung tana him zawkte Champhai district-ah hman a nih theihna tura hmachhawpte an sawiho a, a ṭul angin dan zâwm lote mana hrem an rêl. Jal Shakti Abhiyan - Catch the Rain Campaign kaltlangin ruahtui khâwl khawm leh tuihna humhalh kawnga chanvo leh mawhphurhnate an siam nghal bawk.