Ráltlân tan zirna chhunzawm theih

Mizoram Board of School Education (MBSE) chuan, Myanmar aṭanga Mizorama ráltlân zinga high school leh higher secondary school zirlaite chu Mizoramah zirna chhunzawm phalsak a nih thu nimin khan a puang. MBSE website www.mbse.edu.in-ah registration form lak (download) theih a ni.

MBSE chuan, dan awm sa anga zirlai zawng zawng registration tih vek tur a nih thu a tarlang a, ráltlân zirlai nei sikulte chu a rang lama hma la turin a hriattir.

Ráltlân zirlaite tan an awmna khua/venga LC/VC/YMA/YLA/MTP chairman emaw, president emaw hnen aṭangin ráltlân an ni ngei tih hriatpuina lehkha thil telin Aizawla MBSE office emaw, Lungleia MBSE regional office-ah emaw sikul hotu (head of institution) kaltlangin registration form thehluh tur a ni a; an zirna tilang thei document awm ang angte thil tel vek tur leh chutiang nei lote dilna chu a bika ngaihtuah tur a ni.

Registration form chu November 10, 2021 thleng thehluh theih a ni a, registration fee chu HSS zirlai tan Rs 200 leh H/S zirlai tan Rs 100 a ni.