MAPA-in silai lei rawtna vawi 1 an thlen

Mizoram Armed Police Association (MAPA) chuan, September 14, 2021 khan Police DIG (Armed) hnenah ziakin silai thar ṭha zawk lei rawtna an thlen tih sawiin, chu bak chu a hma leh a hnuah silai lei rawtna sorkar leh Police Headquarters-ah an la thlen ngai lo tih an tarlang.

MAPA chuan thuchhuah siamin, MPYCC-in October 26, 2021-a press handout an tihchhuahah, 'Kan police-te hi ralthuam ṭha zawk leh changkang zawka thuam an ngai a, MAPA-te pawhin silai ṭha zawk an mamawh thu vawi tam tak an thlen tawh ṭhin, mahse, an mamawh ang lei a ni ngai lo a,' tia ziah a nih thu an tarlang a ni.

MAPA thuchhuah chuan, "Ni 14.9.2021 khan DIGP (Armed) hnenah ziakin kan silai hluite thlak nan silai ṭha tam zawk lei ni se, tiin rawtna a thlen a. Hei bak hi tun hma leh tun hnuah silai lei chungchangah MAPA-in sorkarah emaw, Police Headquarters-ah rawtna ziakin emaw, ṭawngka pawhin a la thlen ngailo. MAPA hi sorkar dinhmun hretu a ni a, chuvangin, thil ṭha duhtu sorkar leh PHQ-a kan hotute hnenah thlen fo a ṭulna a hre lo bawk," a ti.

Political party pakhata páwl pakhatin sorkar a demna leh sawiselnaah MAPA hming tarlan a ni chu pawi an tih thu leh hriatthiam harsa an tih thu MAPA chuan an sawi a, tun hnuah thleng tawh lo se an duh thu an tarlang bawk.