Kolasib KVK-in thlai ṭiak an sem

Kolasib Krishi Vigyan Kendra (KVK) chuan, nimin khan KVK Kolasib Community Nursery aṭanga thlasik thlai chi hrang hrang ṭiak an sem chhuak.

Thlai ṭiak sem chhuahte hi International Fund for Agricultural Development (IFAD) hnuaia Project FOCUS aṭanga sem a ni a, broccoli, parbawr, bawkbawn, zikhlum, hmarcha leh tomato ṭiakte sem a ni. Thlai ṭiak dawngtu kal khawmte chu Kolasib KVK senior scientist Dr Michelle C Lallawmkim leh subject matter specialist (Horti) PC Lalrintluanga ten a phun dan leh enkawl zui dante an zirtir nghal.

Kolasib KVK hian Ministry of Agriculture and Farmers’ Welfare hnuaia Skill India, MANAGE- Hyderabad leh SAMETI Mizoram bultumin nimin vêk khan bâwng vulhtute tan ni ruk awh 'Training on Dairy Management' an buatsaih khàrna leh certificate hlanna hun an hmang bawk.