Bru vote thlakna tur bik siam a ni lo; YMA-in khauh taka duty an tum

October 30, naktuka Tuirial bial MLA by-election neih turah Tripura-a awm Bru, Tuirial biala vote neite tan polling station (PS) hranpa siam a ni dawn lo. Hetih lai hian, vote thlak tura political party-te'n Tripura-a Bru-te an hruai lohna turin YMA chuan khauh taka duty an tum.

Vanglaini palai zawhna chhangin Mizoram Election department hotute chuan, Bru-te vote thlak dan turah Election Commi­ssion of India (ECI)-in thu leh hla an neih loh thu an sawi a, "Chuvangin, a hranpaa vote an thlakna tur polling station ruahman a ni lo. Vote thlak duh tan erawh vote an neihna PS-ah an rawn thlak thei dawn tho," an ti.

Tarlan tawh angin, Election department hotute chuan Tripura-a Bru-te chu Mizoram chhunga an awmna polling station ngeia vote thlaktir turin ECI an ngen a; Tuirial bial by-election hun tur puan hma leh puan hnuah ngenna an thlen ve ve tawh a ni.

Vanglaini palai zawhna chhangin Central YMA president Vanlalruata chuan, political party-te'n vote thlâk tura Bru-te an hruai lohna turin khauh taka duty an tum thu a sawi a, "YMA sub-headquarters leh group-te an duty dawn. Bru-te Mizorama an rawn luh theihna Kanhmun, vote an neihna Zodin leh Hortoki bakah kawng lakahte pawh duty kan indah ang," a ti.

CYMA President chuan, an ngenna zâwm vek tura political party-te ngenin, "Kan ngen tawh a, kan ngenna ngai pawimawh lo an awm chuan eng emaw kan tih ve a ngai dawn tihna a ni mai," a ti a; an ngenna zâwm lo an awm chuan an chungah a na thei anga action lak dan committee-in a ngaihtuah tur thu a sawi.

Hetih lai hian, Mizoram chief electoral officer P Jawahar chuan nimin khan hriattirna tichhuakin, inthlan dik leh felfai neih a nih theih nan political party zawng zawngte chu Model Code of Conduct chapter 4.4.2 (B)(vii) zâwm ṭheuh turin a chah.

Model Code of Conduct Chapter 4.4.2. (B)(vii)-ah chuan, vote thlak hun tawp hma darkar 72 (silent period) chhung chu political party-te'n voter-te dik lo zawnga kaihruai thei thil an ti tur a nih loh thu leh, polling station aṭanga metre 100 bial chhungah vote lei tumna emaw voter-te polling station thlenga motor-a phurh pawh khap a ni tih a chuang a ni.