Champhai leh Siaha district-ah Sikul ṭhenkhat hawng ṭan dawn

November 1, 2021 aṭangin Siaha district-ah higher secondary school-te'n sikulah zirna an ṭan tawh dawn a, Champhai district-ah pawh pawl 10 leh pawl 12 zirlaite sikul an kái ṭan dawn.

Champhai bawrhsap Maria CT Zuali chuan October 27, Nilaini khan hriattirna chhuahin, Champhai district-ah pawl 10 leh pawl 12 zirlaite chu November 1, 2021, kar leh Thawhṭanni aṭangin sikulah kai tawh tur a nih thu a puang.

Bawrhsap chuan, Champhai District Education Officer nen ngun taka an sawi dun hnuah November 1 aṭangin pawl 10 leh 12 zirlaite tan sikulah zirna ṭan tura an tih thu a tarlang a, "November 1, 2021 aṭangin pawl 10 leh pawl 12-te'n offline class ṭan tur a ni a, naupangte sikul kal ṭheuh tura hriattir an ni. Hostel leh study centre-te pawh Covid-19 SOP zawm chungin phalsak an ni," a ti.

Champhai DC hian sikula zawm turte a tarlang nghal a; Covid-19 laka invennate khauh taka kenkawh tur a nih thu te, sikul tinin khawsik enna (thermal scanner) an nei tur a nih thu te, Covid-19 symptom neite chu ngaihhnathiam tur an nih thute a chuang a ni.

Siaha District Task Force Committee on Education chu nimin khan an chairman Kesavan R, bawrhsap kaihhruaiin DC conference room-ah an ṭhukhawm a; Covid-19 chungchanga inkaihhruainate zâwm chungin kumin November 1 aṭangin pawl 10 leh 12 zirlaite sikul kai ṭan tawh turin an rél.

Ṭhutkhawmnaa an rèl danin, sikulte'n Covid-19 chungchanga inkaihhruaina leh invênnate an zawm ṭhat leh ṭhat loh vil a, thla khat hnua Committee-a report pe turin School Education department hotute tih an ni a; report azirin middle school leh primary school-te hawn chungchang ngaihtuah leh a ni ang.

Siaha district-ah hian nimin thleng khan zirtirtu 95-in Covid-19 an vei tawh a, mi paruk enkawl mek niin, mi 89 an dam tawh. Zirlai zingah hripui vei mi 358 an awm tawh a, an zinga 356 dam tawhin, enkawl mek pahnih an awm. Siaha district-ah hian primary school 131, middle school 77, high school 26 leh higher secondary school pasarih a awm mek a ni.