Vawiinah Tuirial A/C by-election ; Voter 17,911 zinga 665 Tripura-ah

Tuirial Assembly consti­tuency by-election chu vawiin hian neih a ni dawn ta a, zing dar 7 aṭanga tlai dar 6 thleng vote thlak theih a ni ang. Tripura-a awm mek Bru, Tuirial bial chhunga vote nei mi 665-te tan vote thlakna hmun hranpa siam a ni dawn lo.

Tuirial bial by-election-ah hian party paliin candidate an nei a; chu'ngte chu BJP candidate K Laldinthara, INC candicate Chalrosanga Ralte, MNF candidate K Laldawngliana leh ZPM candidate Laltlanmawia te an ni.

By-election neihna tur Tuirial bialah hian voter 17,911 awmin, mipa 8,819 leh hmeichhia 9,092 an ni a; chu'ng zinga mi 665 chu Tripura state chhunga Bru refugee camp-a awm an ni.

Election department hotute chuan, Bru-te vote thlak dan turah Election Commission of India (ECI)-in ruahmanna hranpa an siam loh thu an lo sawi tawh a, "A hranpaa vote an thlakna tur polling station ruahman a ni lo. Vote thlak duh tan vote an neihna polling station-ah an rawn thlak thei ang," an ti.

Central YMA president Vanlal­ruata pawhin, political party-te'n vote thlâk tura Bru-te an hruai lohna turin khauh taka duty an tum thu te, YMA sub-headquarters leh group-te an duty dawn thu te, Bru-te Mizorama an rawn luh theihna Kanhmun, vote an neihna Zodin leh Hortoki bakah, kawng lakahte duty an indah dawn thute a lo sawi tawh a ni.

Kum 2018 Assembly inthlan­puiah khan Tuirial bialah hian voter 16,874 awmin, mi 14,245-in vote an thlak a, vote tla chu 83.78% a ni a; vote thlaktute chu mipa 8,327 leh hmeichhia 8,548 an ni. Kum 2018-a vote awm zat 16,874 aiin tun ṭuma by-election neih turah hian voter 1,036-in an tam zawk.

Tuirial bialah hian khaw 17-ah polling station 27 a awm a, voter tamna ber khua Kawnpuiah chuan voter 4,659 awmin, voter tlemna ber Seṭhawnah voter 110 an awm thung.

October 30-a vote tlate chu Govt. Kolasib College-ah November 2 zing dar 8 aṭanga chhiar ṭan a ni ang.