Anthurium Festival hman a ni

Tourism department buatsaih Anthurium Festival 2021 chu October 28, Ningani zan khan Vanapa Hall-ah ṭan a ni a, deputy chief minister Tawnluia'n a hawng. Nizan khan Tourism minister Robert Romawia Royte hoin hman chhunzawm a ni a, khâr nghal a ni.

Deputy Chief Minister chuan, anthurium chu Mizoram chhungkaw eng emaw zat tan eizawnna ṭha a nih thu sawiin, "Sorkar laipuiin state hrang hrangte kût an buatsaihna tura sum a pek aṭangin Tourism department-in anthurium pangpar chawia kût an buatsaih hi a inmil hle. Kût buatsaih hi anthurium chawisanna a nih bakah khualzin hîpna ṭha tak a ni," a ti.

Anthurium Festival hawnna ah hian Tourism minister Robert Romawia Royte, Tourism Development Board vice chairman TC Pachhunga leh Tourism secretary K Lalrinzualite pawhin thu an sawi.

Covid-19 avangin Anthurium Festival-ah hian mipui náwlpui an tel lo a; zai, hnam làm, anthurium girl parade leh dance choreography en tur leh ngaihthlak tur a awm a ni.