Chief secretary Lalnunmawia an thlah

Chief secretary Lalnunmawia Chuaungo chu October 31, 2021 thleng chiah chief secretary a ni tawh dawn a, nimin khan Mizoram sorkara secretary-te'n Aijal Club-ah an thlah bakah, Federation of Mizoram Government Employees & Workers (FMGEW)-te'n CS conference hall-ah an thlah bawk.

Secretary-te'n an thlahnaah Lalnunmawia Chuaungo chuan, "Mizoram sorkar hnathawkte taimak leh ṭhahnemngaihna a fakawm em em a, ṭhahnemngaih luatah mi dang rilru tihnat palh a awm chuan an hriatthiamna ka ngen a ni," a ti a; neitu tak tak rilru pu chung leh khawtlang nunphung leh kalphung hre reng chunga hnam tana ṭhahnemngai taka thawk zel turin secretary-te a chah.

FMGEW-in an thlahnaah Lal­nunmawia chuan, sorkar anga thawhpui nuam a tih thu sawiin, "State dang officer-te nen khaikhin­in Mizo officer-te hi fel leh chhuanawm tak tak an ni," a ti a; Mizoram tan an finna leh theihnate nasa zawka hmang a, rinawm taka Mizoram sokar ṭawiawm turin a fuih a ni.

Secretary-te'n an thlahna inkhawm hi Power & Electricity secretary H Lalengmawia'n a kaihruai a, Mizoram sorkara secretary-te leh Mizorama IAS AGMUT cadre member-te'n chawimawina leh thlahna thuchei an hlan.

Lalnunmawia Chuaungo hi IAS 1987 batch (Gujarat Cadre) a ni a; Mizoram sorkarin chief secretary lailâwk tura a ruat JC Ramthanga, IAS 1989 batch, Manipur & Tripura cadre hnenah chief secretary mawhphurhna a hlan nghal a ni.