Scho. buaipui tur kan insiam - HTE Minister

Mizo Students Union chuan nimin khan Chanmari YMA Hall-ah General Conference vawi 19-na an hmang a; khuallian Higher & Technical Education (HTE) minister Dr R Lal­thangliana chuan, scholarship buaipui tur an insiam thu a sawi.

HTE Minister chuan, India sorkarah thil buai­thlak, file tih dan tur bik a awm ṭhin thu sawiin, "Ministry of Tribal Affairs leh he lamin kan thawn kualah thil kal thelh leh inmil lo a awm. Tribal Affairs Secretary leh mi pawi­mawh dang pawh ṭum thum telephone-in ka bia a, a buaipui tur kan insiam. Kar leh lamah chuan lo tifel ngei rawh u ka ti," a ti.

MZU Southern Campus nei turin an nawr nasa nia sawiin R Lalthangliana chuan, "USA aṭanga Delhi ka thlen hlim khan in tihfel hma loh chu ka haw lo ang ka ti. An file ka en lui a, Union Minister hming sign a ngai si a, tlaiah ka lo kal nawn leh ang ka ti a, tlaiah notification a chhuak ta a, ka lawm tak zet a ni," a ti a; MZU Southern Campus chu chhim lam tan chauh ni lo, Mizoram pum tan a nih thu a sawi.

HTE Minister chuan, Mizo zingah IAS an tlem tial tial tih sawiin, "Zo fate hi central service lamah kan intuai hriam a ngai tak zet. Mizo zirlaite hian khawvel hi a chho zawngin en lo ang u, a chhuk zawnga kan en lo a nih pawhin a phei zawng talin en ila, hnam dangin an theih chu Zo fate hian kan thei a ni tih hria ang u," a ti.

MSU inkhawmpui hi vice president RK Hnuna'n a kaihruai a, khualzahawm Salai Lian Luai, Chin state chief minister leh MSU president J Lalmuanzuala te pawhin thu an sawi a ni.