SEDP hlawhtlin theih nan ṭan la turin Deputy CM-in MCS officer-te a chah

Mizoram Civil Service Association (MCSA) chuan nimin khan Synod Conference Centre-ah General Conference vawi 45-na an hmang a, deputy chief minister Tawnluia'n a hmanpui. Minister chuan, SEDP chu zir chiang a, a hlawhtlin theih nana nasa taka ṭan la turin MCS officer-te a chah.

Tawnluia chuan, MCS officer-te chu state inrêlbàwlnaa a kúl a táia sorkarin a hman ṭhin an nih thu sawiin, "Ministry hian flagship programme pawimawh tak a nei a, Covid-19 vangin hma la zung zung thei rih lo mah ila hma lam hun a zia zel turah ngaiin, scheme kan kenkawhnaah SEDP hi zir chiang a, a hlawhtlin theih nan nasa takin ṭan la ang che u," a ti.

Deputy Chief Minister chuan, MCS-te tan khawi lai pawh home posting anga ngaih tur a nih thu a sawi a, civil service chak leh ṭha tak ramin a neih theih nana intuaithar zel turin a chah bawk.

Dy. Chief Minister tarlan danin, MCS officer grade hrang hrang parukah mi 183 an awm mek a, service rules mumal zawk a awm theih nan MCS Rules 2021, MCS (Limited Competitive Examination) Rules 2021 leh MCS (Induction) Regulations, 2021-te buatsaih a ni tawh a, rei lo têah hman ṭan tum a ni.

Minister Tawnluia hian MCSA magazine RAHBI tih chu a tlangzarh a, MCSA vice president Florence Zotluangpuii kaihhruaiin MCS thi mi 15 sûnna hun hman a ni a; Chief Minister Award dawngtu H Lalchhandami leh Lalrinawma Khiangte te hnenah lawmpuina hlan a ni bawk.