KHAWTHLIR

Thisen pe
Serchhip Chanmari Branch YMA chuan nimin khan Serchhip District Hospital tan thisen unit 22 an pe a, petute mipa 16 leh hmeichhia paruk an ni. Kolasib-a Wesleyan Methodist Youth Fellowship (WMYF) pawhin an silver jubilee pualin nimin khan Kolasib District Hospital-ah thisen unit sarih an pe a, petute mipa panga leh hmeichhia pahnih an ni.

Lirthei tlân phal lo
PWD-in November 3, 2021 thleng zing dar 9:30 aṭanga tlai dar 4 inkarah Tlangnuam Mualveng leh Saikhamakawn inkar kawng blacktop hna an thawk dawn a, hei vang hian hna thawh chhungin kawngah hian lirthei tlân phal a nih loh thu Aizawl Traffic SP-in a puang. Hnathawh tibuai thei tura kawngpui sira lirthei leh bungrua dah phal a ni lo bawk.

Mini Kiosk thar
Health department chuan Rapid Antigen Test hmanga swab sample endikna, Covid-19 Testing Mini Kiosk atan Zemabawk North YMA In, ITI Veng Bal Bhavan leh Kulikawn Ngizela Commerce & Industries building-te a puang.

ECI-in phalsak
Chief Electoral Officer-in by-election neihna biala electoral roll ennawnna, Integrated draft electoral roll of Special Summary Revision of Photo Electoral Rolls 2022 tihchhuah ní tur Election Commission of India (ECI) hnena sawn hlat a dilna chu ECI chuan a phalsak a, tihchhuah ni atan November 8, 2021 ruahman a ni.

Ventilator-in mi 24 enkawl
State Referral Hospital (ZMC)-ah nimin khan mi 21 dah luh belh an ni a, nimin tlai dinhmun angin, hripui vei mi 192 an awm mek. Covid-19 vei enkawl lai mi 192 zinga 30 chu ICU-ah enkawl niin, an zinga mi 24 chu ventilator hmantir an ni.

Campaign pawtsei
Health minister Dr R Lalthangliana chuan, Covid-19 laka himna tura All Mask Campaign kalpui mek chu October 30 thleng pawhsei tawh chu November 15, 2021 thleng pawhsei leh a nih thu nimin khan MSU khawmpui Chanmari YMA Hall-a a hmanpuinaah a puang.