Covid-19 inkaihhruaina thar a chhuak ; Zanah inkhawm phal a ni tawh dawn
State Disaster Management Authority (SDMA) hnuaia State Executive Committee chairman Lalnunmawia Chuaungo, chief secretary chuan nimin khan October 31, 2021 aṭanga November 31, 2021 zanlai dar 12 thlenga hman tur inkaihhruaina a tichhuak a; Aizawlah zanah kohhran inkhawm phal a ni tawh dawn.
Chief Secretary chuan, Mizoram chhunga Covid-19 darh dan leh mipui zinga hri vei thar awm dan thlirin inkaihhruaina kalpui mek leh hripui veite enkawl kawnga hmalakna chhunzawm zel chu SDMA-in ṭha niin a ngai tih a tarlang a, "Covid-19 hripui laka kan him theih nan leh mipuite'n eizawnna kawng an zawh zel theih nan Covid-19 Appropriate Behaviour (CAB) ṭha taka zâwm chungin inkaihhruaina kan hman mek chu tlem tidanglamin kalpui chhunzawm ṭha a ti," a ti.
Inkaihhruaina hi Aizawl khawpui, Aizawl khaw páwn leh Mizoram puma hman tur anga ṭhen a ni a, Aizawl khawpuia inkaihhruaina chu hmun dang aiin a khauh deuh zawk. Thil tam tak chu a ngai anga hman zui tur a ni a, ṭhenkhat thlahdul a ni thung.
Inkaihhruaina thar ang chuan, Aizawl khawpuiah chhun bakah, zanah biak-ina kohhran inkhawm phal a ni tawh dawn a, biak-ina ṭhutnaa leng zat chanve (50%) aia tam lo inkhawm phal a ni a, zai phal a ni lo thung. HSLC leh HSSLC exam tur tan sikul leh hostel hawn phal a ni bawk. District magistrate-te chu zan dar 9 aṭanga zing dar 4 inkarah curfew puang tura tih an ni. Aizawl páwn lam, Mizoram hmun dangah chuan DC-te'n an district-a hripui lêng dinhmun azirin inkaihhruaina an siam thei dawn a ni.