Ni 9 chhung a záwnin positivity rate 10% hnuai lam a ni tawh

October 28, Ningani khan Mizoramah Covid-19 vei mi 592 hmuh chhuah a ni a, ni kaw chhung a záwnin sample endik zat aṭanga hripui vei hmuh zat (positivity rate) 10% hnuai lam a ni tawh. Nimin khan tlai dar 5 thlengin hripui vei dam tawh mi 246 chhuahtir an ni a, Covid-19 vanga thi an awm lo.

Covid-19 vei Ningania hmuh tharte chu mipa 238 leh hmeichhia 354 an ni a; ZMC laboratory-a hmuh chhuah 54, TrueNAT hmanga hmuh 53, RAT hmanga hmuh 484 leh Fluorescent Immu­noassay (FIA) hmanga hmuh pakhat an ni.

IDSP record angin, Mizoramah Covid-19 vei 1,20,088 hmuh chhuah a ni tawh a, mipa 58,425 leh hmeichhia 61,663 an ni. Nimin tlai dar 5 thleng khan mi 1,12,846 (93.97%) chhuahtir an ni tawh a, mi 427 (0.36%) thi tawhin, enkawl mek mi 6,815 (5.67%) an awm.

October 28, Ningania Covid-19 vei hmuh thar mi 592-te chu symptom nei 386 leh nei lo 206 an ni a; tualchhunga kái 590 leh tun hnaia state pawn aṭanga rawn lut mi pahnih niin, tualchhunga kai zingah hri kàina chin hriat loh 267 an awm.

October 20 aṭangin Mizoramah a záwnin ni tin positivity rate 10% hnuai lam a ni tawh a, a hniam ber ní, October 24, Pathianniah 6.05% a ni. Mizorama district 11 zingah Aizawl district chu hripui hluar lama a laihâwl vel a ni a, October 20, 2021 aṭangin positivity rate ni tin 9% hnuai lam a ni tawh a, a hniam ber ṭum October 24 khan 5.20% a ni. Kolasib, Saitual leh Khawzawl district-te chu positivity rate hniam zualna district a ni.
Hetih lai hian, Lunglei, Serchhip, Mamit leh Hnahthial district-te chu hripui hluar mekna district a ni thung a; tun hnai chawlhkar khat chuang chhung chu positivity rate 10% chung lam a ni reng bakah, ni ṭhenkhatah phei chuan 20% leh 30% tlin chángte pawh a awm.

Kumin October thla ni 28 chhungin Mizoramah Covid-19 positive mi 25,258 hmuh chhuah a ni tawh a, chawhrualin ni tin mi 902.07 hmuh chhuah an awm ziah ang a ni a, a tlahniam hret hret zel. Kum 2011 chhiarpui aṭanga chhûtin, Mizorama Covid-19 vei hmuh tawh 1,20,088 chu mi 1,000 zelah hripui vei mi 109 an awm ang a ni a; mi 1,00,000 zela Covid-19 vangin mi 39 an thi tawh ang a ni.

Nimin khan tlai dar 5 thlengin hripui vei dam tawh mi 246 chhuahtir an ni a; Aizawl district-ah mi 190, Champhai district-ah 28, Lunglei district-ah 19, Kolasib district-ah pasarih leh, Saitual leh Khawzawl district-ah mi pakhat ve ve an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Covid-19 positive hmuh tawh 1,20,088 zinga mi 1,15,538 chu Mizoram chhunga kái chhâwng an ni a, mi 4,550 chu Mizoram páwn aṭanga an rawn luh hnua hmuh chhuah an ni.