Mizoramah Covid-19 vangin mi an 427 thi tawh
Mizoramah nimin khan tlai dar 5 thlengin Covid-19 vanga thi an awm lo a, October 28, Ningani zanah mi pahnih an thi thung. IDSP tarlan danin, nimin tlai dar 5 thlenga Mizorama Covid-19 vanga thi tawh zat chu mi 427 an ni a, October thla kal mek bikah mi 117 an thi tawh.
October 28, Ningani zan dar 8:45 khan K Doliana (73), Champhai Vengsang chu Champhai DCHC (District Hospital)-ah a thi a, hripui vei a ni tih October 20-ah hmuh chhuah a ni. Ningani zan vek dar 11:20 khan Vanlalmawia (86), West Phaileng Dinthar chu West Phaileng CCC-ah a thi a, Covid-19 positive a ni tih October 20 khan hmuh chhuah a ni. Mitthi pahnih hi natna dang nei tel ve ve an nih thu sorkar thuchhuakin a tarlang.